ایبٹ آباد: جناح آباد میں14 سالہ گھریلو ملازمہ کے قتل کے ملزم کو گرفتار کر لیا گیا۔
ایبٹ آباد کے علاقے حبیب اللہ کالونی میں جنسی زیادتی کا شکار 14 سال کی گھریلو ملازمہ ہسپتال میں دم توڑ گئی۔ معصوم لڑکی 7 ماہ سے ملزم حارث کے گھر ملازمت کر رہی تھی۔
والد کے مطابق اسے مسلسل جنسی تشدد کا نشانہ بنایا جارہا تھا، حالت بگڑی تو ہسپتال لائے مگر وہ جانبر نہیں ہوسکی۔
ایوب میڈیکل کمپلیکس میں کیے گئے پوسٹ مارٹم میں جنسی زیادتی کی تصدیق ہوگئی، بچی کے جسم پر تشدد کے واضح نشانات تھے، ڈاکٹرز نے انکشاف کیا ہے کہ بچی کو نہ صرف جنسی تشدد کا سامنا تھا بلکہ کھانا پینا بھی فراہم نہیں کیا جارہا تھا۔
ڈی ایس پی سراج احمد کے مطابق ملزم حارث کو گرفتار کرکے مقدمہ درج کرلیا گیا ہے، پوسٹ مارٹم کے بعد بچی کی لاش والد کے حوالے کر دی گئی، اور مزید تفتیش جاری ہے۔
دوسری جانب مقتول بچی کے والد نے مطالبہ کیا ہے کہ ملزم کو قرار واقعی سزا دے کر انہیں انصاف فراہم کیا جائے۔
