لاہور: فضائی آلودگی کم کرنے کیلئے پانی کا چھڑکاؤ کا تجربہ کامیاب ہونے یا پانی بحران میںہزاروں لیٹر روزانہ چھڑکاؤ پر تشویش پیدا ہو گئی ہے.
حکومت کی جانب سے لاہور، ملتان اور دیگر شہروں میں جہاں ایک جانب اینٹی سموگ گنز کے ذریعے پانی کا چھڑکاؤ کر کے فضائی آلودگی کم کرنے کی کوشش کی جاررہی ہے، وہیں شہری اور ماہرین پانی کے ضیاع پر تشویش میں ہیں۔
لاہور اور ملتان سمیت پنجاب کے بڑے شہروں میں اینٹی سموگ گنز کو فضائی آلودگی عارضی طور پر کم کرنے کے لیے استعمال کیا جا رہا ہے. یہ گنز دن رات سڑکوں اور اہم مقامات پر پانی چھڑک کر فضا صاف کرنے کی کوشش کر رہی ہیں۔
دوسری جانب شہری اور ماہرین روزانہ ہزاروں لیٹر پانی کے استعمال پر سوال اٹھا رہے ہیں کہ کیا یہ ماحول دوست حل ہے یا پانی کے بحران کو مزید بڑھا رہا ہے۔
اعداد و شمار کےمطابق ایک گن روزانہ ہزاروں لیٹر پانی فضا میں چھوڑتی ہے،لیکن اس کا اثر صرف تین سے چار گھنٹے تک رہتا ہے۔ اس کے بعد سموگ دوبارہ پھیلنا شروع ہو جاتی ہے۔اس لئےجہاں زیر زمین پانی کی سطح تیزی سے نیچےجا رہی ہو،وہاں روزانہ ہزاروں لیٹر پانی کا چھڑکاؤ ایک نیا سوال کھڑا کر رہا ہے۔شہریوں نے اس ٹیکنالوجی کو قیمتی وسائل کا ضیاع قرار دیا ہے۔
ماہرین ماحولیات کاکہنا ہےکہ کسی بھی بہتری کے لیے کچھ نقصان برداشت کرنا پڑتا ہے، لیکن یہ ٹیکنالوجی مستقل حل نہیں ہے۔ماہرین کے مطابق لاہور اور پنجاب کے دیگر شہروں میں فضائی آلودگی کا مستقل حل تلاش کرنے کے ساتھ حکومت پانی کے بہتر استعمال اور ری سائیکلنگ کے طریقے اپنانےچاہیئں۔
