اسلام آباد:سینیٹ کی قائمہ کمیٹی برائے مواصلات نے موٹروے پولیس کو شہریوں کے نکاح نامے چیک نہیں کرنے کی ہدایت جاری کر دیں، جبکہ سینیٹر سیف اللہ ابڑو کا سینیٹرز کے نام ہینڈ آؤٹ میں شامل کرنے پر قانونی بنیاد اور وضاحت طلب کرنے کا مطالبہ کردیا۔
سینیٹر پرویز رشید کی زیرصدارت سینیٹ کی قائمہ کمیٹی برائے مواصلات کا اجلاس ہوا جس میں موٹروے پولیس کی کارکردگی اور حالیہ اقدامات کا جائزہ لیا گیا۔
چیئرمین کمیٹی نے موٹروے پولیس کو شہریوں کے نکاح نامے چیک کرنے سے گریز کی ہدایت کرتے ہوئے اسے غیر ضروری عمل قرار دیا اور کہا کہ موٹروے پولیس کو اپنے بنیادی فرائض پر توجہ دینی چاہیے۔
اجلاس میں موٹروے پولیس کے ہینڈ آؤٹ پر بھی اعتراض اٹھایا گیا۔
سینیٹر سیف اللہ ابڑو نے سوال کیا کہ ہینڈ آؤٹ میں بعض سینیٹرز کے نام کس قانونی بنیاد پر شامل کیے گئے اور برآمد سامان کو مخصوص سینیٹرز سے منسوب کرنے کی معلومات کہاں سے حاصل ہوئیں۔
انہوں نے کہا کہ کسی فرد کے ذاتی فعل کو سینیٹ یا اس کی کسی کمیٹی سے منسوب نہیں کیا جا سکتا، اگر کسی شخصیت یا سینیٹر کا نام جاری کیا گیا ہے تو مکمل وضاحت ہونی چاہیے۔آئی جی موٹروے پولیس نے مؤقف اختیار کیا کہ کارروائیاں کسٹمز حکام سے موصول ہونے والی اطلاعات کی بنیاد پر کی جاتی ہیں۔
