ویب نیوز: دنیا کی سب سے بڑی اور مقبول کرپٹو کرنسی بٹ کوائن کی قیمت ایک لاکھ 16ہزار250 ڈالر تک پہنچ گئی جواس کی اب تک کی بلند ترین سطح ہے۔
ڈیجیٹل کرنسی ایکسچینج کے جاری کردہ تازہ ترین اعداد و شمار کے مطابق بٹ کوائن کی قیمت برطانوی وقت کے مطابق رات 9 بجکر 20 منٹ پر 116,000 ڈالر کی حد عبور کرتے ہوئے 116,250 ڈالر تک جا پہنچی۔
واضح رہے کہ بٹ کوائن 2008 میں ساتوشی ناکاموتو کے نام سے کسی نامعلوم شخصیت یا گروہ نے متعارف کرایا تھا۔ یہ کرپٹو کرنسی روایتی مالیاتی نظام سے ہٹ کر بلاک چین ٹیکنالوجی پر مبنی ہے، جس نے گزشتہ چندسالوں میں دنیا بھر میں بے پناہ مقبولیت حاصل کی ہے۔
دوسری جانب ڈیجیٹل اثاثوں کی بڑھتی ہو ئی اہمیت کے باعث پاکستان میں کرپٹو کرنسی کا نیا نظام متعارف کروا دیا گیا ، نیو یارک کے آزاد میڈیا پلیٹ فارم کوائن ٹیلی گراف میگزین نے پاکستان کرپٹو کرنسی اور بلاک چین کے اقدامات کو سراہا ۔
وزیر مملکت اور سی ای او پاکستان کرپٹو کونسل بلال بن ثاقب کے مطابق پاکستان اپنے بٹ کوائن ذخائر قائم کرے گا تاکہ مالی استحکام کو یقینی بنایا جا سکے۔کوائن ٹیلی گراف میگزین کے مطابق پاکستان کرپٹو اثاثوں کو باضابطہ قومی ذخائر کا حصہ بنانے جا رہا ہے اور ان سے ڈی سینٹرلائزڈ فنانس کے ذریعے آمدن بھی حاصل کرے گا۔
بلال بن ثاقب نے مائیکرو اسٹریٹیجی کے ایگزیکٹو چیئرمین مائیکل سیلر سے بھی ملاقات کی اور انہیں پاکستان کے اسٹریٹجک بٹ کوائن ریزرو میں مشیر بننے کی پیشکش کی۔
کوائن ٹیلی گراف کے مطابق پاکستان 2024ء میں کرپٹو اپنانے کی رفتار کے لحاظ سے دنیا بھر میں نواں نمبر حاصل کر چکا ہے۔ وزارت خزانہ، اسٹیٹ بینک اور ایس ای سی پی مل کر ایک مضبوط کرپٹو فریم ورک کی تشکیل میں مصروف ہیں تاکہ اس شعبے میں شفافیت، تحفظ اور معاشی ترقی کو یقینی بنایا جا سکے۔
