تھرپارکر:ضلعی ہیڈکوارٹر مٹھی کے ہسپتال میں گزشتہ تین ہفتوں میں غذائی قلت اور مختلف امراض کے باعث 45 معصوم بچے دم توڑ گئے، جبکہ 75 بچے اب بھی زیر علاج ہیں۔
ایم ایس سول ہسپتال مٹھی کے مطابق گزشتہ 24 گھنٹوں کے دوران جاں بحق ہونے والے 3 بچوں کی عمریں ایک سال سے کم تھیں۔
ایم ایس کے مطابق سردی اور غذائی قلت کے باعث یہ بچے پیدائشی طور پر کم وزن اور مختلف بیماریوں کا شکار تھے جو دوران علاج جانبر نہیں ہوسکے۔
ایم ایس مٹھی ہسپتال کا کہنا ہےکہ بچوں کے وارڈ میں گنجائش 70 بچوں کی ہے، جبکہ اس وقت سردی اور دیگر امراض میں مبتلا 76 بچے زیر علاج ہیں۔
بیمار بچوں کے والدین کا کہنا ہے کہ ہسپتال کے بچوں کے انتہائی نگہداشت وارڈ میں طبی سہولیات کی کمی کا سامنا ہے۔
ضلعی انتظامیہ کی جانب سے بھی بچوں کی صحت اور غذائی قلت کے حوالے سے اقدامات کا آغاز کر دیا گیا ہے.
