اسلام آباد: چیف جسٹس پاکستان جسٹس یحییٰ خان آفریدی کی زیر صدارت فل کورٹ اجلاس میں اہم امور پر غور کیا گیا اجلاس کے بعد سپریم کورٹ نےاعلامیہ جاری کر دیا گیا۔
سپریم کورٹ میں چیف جسٹس آف پاکستان جسٹس یحییٰ آفریدی کی زیر صدارت فل کورٹ اجلاس منعقد ہوا۔ اجلاس میں سپریم کورٹ کے تمام معزز ججز نے شرکت کی، جس میں جسٹس منصور علی شاہ، جسٹس منیب اختر سمیت دیگر ججز بھی شامل تھے۔ اجلاس کے بعد سپریم کورٹ کی جانب سے اعلامیہ جاری کیا گیا۔
اعلامیہ کے مطابق اجلاس کے دوران کئی اہم امور پر غور کیا گیا، جن میں سرکاری خرچ پر تعینات وکلاء کی فیسوں پر نظرثانی سرفہرست ایجنڈا آئٹمز میں شامل تھی۔
فل کورٹ اجلاس میں ریٹائرڈ ہائیکورٹ ججز کی بطور وکیل سپریم کورٹ میں انرولمنٹ پر بار کونسل کی سفارشات کا بھی جائزہ لیا گیا۔اجلاس میں معلومات تک رسائی کے حوالے سے سپریم کورٹ رولز 2025 کے مجوزہ مسودے پر بھی تفصیلی غور و خوض کیا گیا۔
اعلامیہ میں کہا گیا کہ فل کورٹ کی طرف سے تمام ایجنڈا آئٹمز پر مناسب ہدایات جاری کر دی گئی ہیں اور آئندہ فل کورٹ اجلاس جلد بلانے پر اتفاق کیا گیا ہے۔
سپریم کورٹ کے ترجمان کے مطابق اجلاس کا مقصد عدالتی نظم و نسق اور وکلاء سے متعلق اُمور کو مزید مؤثر بنانا تھا۔
