لاہور: عیدالفطر کے دوران صوبہ بھر میں عارضی نصب مکینیکل جھولوں پر پابندی عائد کر دی گئی۔
محکمہ داخلہ پنجاب کی جانب سے جاری نوٹیفکیشن کے مطابق عارضی طور پر نصب کی گئی مکینیکل جھولوں پر پابندی کا فیصلہ صرف اور صرف انسانی جانوں کے تحفظ کیلئے کیا گیا ہے.
محکمہ داخلہ کے مطابق پابندی کا اطلاق پنجاب بھرمیں ہوگا جبکہ اس حوالے سے تمام ڈپٹی کمشنرز کے نام مراسلہ بھی جاری کردیا گیا ہے، جس پر سختی سے عملدرآمد کی ہدایت کی گئی ہے.
مراسلے کے مطابق عید کے دوران پارکوں میں بچوں سمیت بڑی تعداد میں لوگوں کی آمد متوقع ہے اور تفریحی پارکس، تھیم پارکس، پلے ایریاز میں مستقل لگائے گئے مکینکل جھولوں کی مشروط اجازت دی گئی ہے جبکہ مستقل بنیادوں پر لگائے گئے جھولوں کیلئے فٹنس سرٹیفکیٹ کا حصول بھی لازمی قرار دیا گیا ہے، اور فٹنس سرٹیفکیٹ کے بناء کسی جھولے کو چلانے کی اجازت نہیںہوگی۔
محکمہ داخلہ پنجاب کے مطابق لاہور میں مرکزی کنٹرول روم بھی قائم کردیا گیا ہے جو 24 گھنٹے پنجاب بھر سے رپورٹس مرتب کرے گا، اور کسی بھی ہنگامی صورتحال پر فوری ایکشن کیا جائےگا۔
محکمہ داخلہ کے مطابق امن و امان کا قیام اور حکومتی احکامات پر عملدرآمد یقینی بنایا جائے گا اور سینئر افسران کی قیادت میں عید کی چھٹیوں میں کام جاری رہے گا، جس کے لئے تمام افسران اور متعلقہ محکموںکو الرٹ رہنے اور سٹیشن نہیں چھوڑنے کی بھی ہدایت جاری کر دی گئی ہے۔
