ملتان: ویمن یونیورسٹی ملتان کے شعبہ کیمیا کی پی ایچ ڈی سکالر محراب خان کو ڈاکٹریٹ کی ڈگری سے نوازا گیا۔ اس حوالے سے ویمن یونیورسٹی ملتان کے کچہری کیمپس میں ایک تقریب منعقد ہوئی۔ تقریب میں ڈاکٹر سارہ مصدق، ڈاکٹر عارف، ڈاکٹر محمد اظہر عباسی اور دیگر فیکلٹی ممبران نے شرکت کی۔
ان کے تحقیقاتی مقالے کا عنوان تھا: "Fabrication of Carbon Supported Inorganic Nanocomposites for Catalytic Applications”
(کاربن سے مدد یافتہ غیر نامیاتی نینو کمپوزٹس کی تیاری برائے کیٹالٹک استعمالات)۔
محراب خان نے اپنا تحقیقی کام ڈاکٹر سارہ مصدق کی زیر نگرانی مکمل کیا، جبکہ بیرونی سپروائزر ڈاکٹر محمد اظہر عباسی تھے۔
اپنے مقالے کا دفاع کرتے ہوئے محراب خان نے کہا کہ کاربن نینو کمپوزٹس کو کیٹالسس میں ان کی چھوٹی جسامت اور شکل پر مبنی طبعی و کیمیائی خصوصیات کی وجہ سے بے حد اہمیت حاصل ہو گئی ہے۔ خاص طور پر، دھاتی نینو ساختوں اور کاربن مواد (خصوصاً گرافین اور کاربن نینو ٹیوبز) پر مبنی نینو کمپوزٹس نے نامیاتی تعاملات میں غیر معمولی کارکردگی دکھائی ہے۔
انہوںنے بتایا کہ کاربن نینو کمپوزٹس کے استعمال سے تیار کردہ مصنوعات مختلف شعبوں جیسے دواسازی، بائیومیڈیکل، زراعت اور مٹیریل سائنس میں بہت قیمتی ثابت ہوئی ہیں۔ لہٰذا، کاربن نینو کمپوزٹس کی مانگ تیزی سے بڑھ رہی ہے اور ان کی تیاری کے نئے طریقوں کی ترقی بھی بے حد اہمیت رکھتی ہے۔
محراب خان نے حاضرین کے سوالات کے تسلی بخش جوابات دے کر اپنے تھیسس کا کامیابی سے دفاع کیا، جس پر موجودہ شرکاء نے انہیں ڈاکٹریٹ کی ڈگری دینے کی سفارش کی۔
شعبہ کیمیا کی چیئرپرسن ڈاکٹر سارہ مصدق نے کہا کہ ویمن یونیورسٹی سماجی اور قدرتی علوم کے میدان میں اعلیٰ معیار کی تحقیق فراہم کر رہی ہے، جس کی وجہ سے اس جامعہ کو قومی اور بین الاقوامی سطح پر پذیرائی حاصل ہو رہی ہے۔
انہوں نے ڈاکٹر محراب خان کو کامیاب ڈیفنس پر مبارکباد پیش کی۔
