ملتان: ایڈیشنل سیشن جج ملتان نے کم سن بچی سے جنسی زیادتی کی کوشش کرنے کے مقدمے میں جرم ثابت ہونے پر ملزم ڈاکٹر محمد کامران خان کو عمر قید اور 01 لاکھ روپے جرمانہ کی سزا سنا دی۔
تفصیلات کے مطابق ملزم نے سال 2024ء میں تھانہ ممتاز آباد کے علاقے گول پلاٹ میں ایک 10 سالہ معصوم بچی کو اپنے کلینک میں بلاکر ہوس کا نشانہ بنانے کی کوشش کی تھی۔ واقعہ کا مقدمہ نمبر 2691/24 بجرم 377B تھانہ ممتاز آباد درج کیا گیا تھا، جس کے بعد پولیس نے فوری کارروائی کرتے ہوئے ملزم کو گرفتار کر لیا تھا۔
پولیس تھانہ ممتاز آباد نے جدید تفتیشی طریقوں اور ٹھوس شواہد کی بنیاد پر چالان مکمل کر کے عدالت میں جمع کرایا۔ ٹرائل مکمل ہونے کے بعد عدالت نے جرم ثابت ہونے پر مجرم محمد کامران کو عمر قید اور 01 لاکھ روپے جرمانہ کی سزا سنائی۔ عدالت نے حکم دیا کہ اگر مجرم جرمانہ ادا نہیں کرے تو اسے مزید چھ ماہ قید بھگتنا ہوگی۔
قانونی و سماجی ماہرین کے مطابق یہ فیصلہ کم سن بچوں کے تحفظ اور معاشرتی برائیوں کے خاتمے کے لیے ایک اہم سنگ میل ہے۔
