لاہور : گورنرپنجاب سردار سلیم حیدر خان کا کہنا ہے کہ بلدیاتی ایکٹ 2025 میرے دستخط کا منتظر ہے اور میں بلدیاتی ایکٹ کو سمجھنے کا منتظر ہوں۔
مری بار ایسوسی ایشن کی استقبالیہ تقریب سے خطاب کرتے ہوئے گورنرپنجاب سردار سلیم حیدر خان کا کہنا تھا سیکرٹری بلدیات پیر کو بریفنگ دیں گے،پھر بلدیاتی ایکٹ 2025 پر فیصلہ کریں گے۔
انھوں نے کہا کہ میں اس ملک کا رہائشی ہوں، بیرون ممالک جائیدادیں بھی نہیں، نہ کہیں شفٹ ہونا ہے، احتجاجی مظاہروں سے ملکی ترقی کا راستہ نہ روکا جائے ، جذبات میں آکر اپنے ہاتھوں سے اپنے ملک کا نقصان نہ کریں۔
گورنرپنجاب سردار سلیم حیدر خان کا کہنا تھا مری میں تجاوزات آپریشن کیلئے مقامی لوگوں کے گلے شکوے دور کرنےکی ضرورت ہے، سڑکیں بند کرنے، دکانیں جلانے اور عوام کی مال وجان کو نقصان پہنچانے کےخلاف سخت قانون سازی ہونی چاہیے، مزید برآں انٹرنیشنل میڈیا پر اپنے ملک کو بدنام کرنے کی سخت سزا ہونی چاہیے۔
گورنر پنجاب نے وکلاء کے مسائل حل کرانے کی بھی یقین دہانی کرائی.
