راولپنڈی: 3 بچوں کی مبینہ طور پر زہریلا دودھ پینے سے ہلاکت کا مقدمہ والد کی مدعیت میں بچوں کی ماں کے خلاف درج کرلیا گیا۔
ایف آئی آر کے مطابق بچوں کے والد نے بیان دیا ہے کہ واقعہ سے ایک روز قبل اس کا بیوی سے جھگڑا ہوا تھا، اس دوران زنیرہ نے دھمکی دی کہ میں بچوں کا کچھ کرلوں گی۔
والد کے مطابق بچوں کی بے ہوشی کی اطلاع پڑوسی فرحان نے ٹیلی فون پر دی ۔ قوی شک ہے کہ اہلیہ نے بچوں کو زہر دے کر یا کسی اور طریقے سے قتل کیا۔
پولیس کا کہنا ہے کہ نامزد ملزمہ پہلے ہی ہسپتال میں زیر علاج اور حفاظتی تحویل میں ہے۔ بچوں کی لاشوں کا پوسٹ مارٹم کروا لیا گیا ہے، اور رپورٹ ملنے کے بعد ہی موت کی اصل وجہ سامنے آئے گی۔
خیال رہےکہ اس سے قبل بھی ایک والدہ کی جانب سے پسند کی شادی کے لئے اپنے بچوں کو مارنے کا واقعہ منظر عام پر آ چکا ہے.
