ملتان:کمشنر عامر کریم خاں سے 52 کامن ٹریننگ پروگرام کے نئے افسران کے وفد نے ملاقات کی۔کمشنر عامر کریم خاں نے ملتان ڈویژن بارے سوالات پر تفصیلی جوابات دیتے ہوئے بتایا کہ تجاوزات،غیر قانونی پارکنگ سٹینڈ، وال چاکنگ ، قبضہ مافیا، گراں فروشی،ذخیرہ اندوزی، جیسے متعدد چیلنجز کا سامنا ہے۔ستھرا پنجاب مہم وزیراعلیٰ پنجاب مریم نواز کا تاریخی اقدام ہے، ستھرا پنجاب مہم میں صفائی کا نظام آؤٹ سورس کیا جاچکاہے۔
کمشنر ملتان کا کہنا تھا کہ خطے کی ثقافت اور کلچر کو اجاگر کرنا بہت ضروری ہے۔فنکاروں ، ادیبوں ، شاعروں کی مالی معاونت کرنے بارے بھی پالیسی مرتب کی جارہی ہے۔ فنون لطیفہ سے تعلق رکھنے والے افراد کی خدمات کو سراہنے کیلئے ان کے گھروں کے باہر اعزازی تختیاں لگائی جائیں گی۔
عامر کریم خان نے کہا کہ ٹریننگ کورسز افسران کی شخصیت سازی میں اہم کردار ادا کرتے ہیں۔اپنے کیرئیر کے دوران ایمانداری سے کام کرنا ہی افسران کا طرہ امتیاز ہے۔ کرپشن جیسے ناسور کو ختم کرکے سروس ڈیلیوری بہتر بنائی جاسکتی ہے۔
کمشنر نے بتایا کہ ملتان کی ترقی و خوشحالی کےلئے مختلف شعبوں میں سرمایہ کاری کی ضرورت ہے۔مختلف ملکوں کے سفیروں نمائندوں سے ملکر مقامی پراڈکس کی بیرون ملک ترسیل بارے بات چیت کی، اس طرح سیوریج سے متعلق مسائل کا حل اور صاف پانی تک عوام کی سہل رسائی اولین ترجیح ہے۔ پنجاب صاف پانی اتھارٹی کیساتھ ملکر لائحہ عمل مرتب کیا جارہا ہے۔ شہریوں کو صاف پانی کی فراہمی کیلئے نجی سیکٹر کے تعاون سے واٹر فلٹریشن پلانٹس کی فعالی پر کام ہورہا ہے۔
انہوںنے بتایا کہ ملتان ایک تاریخی شہر ہے، اس کی ترقی کے لیے اس کے سیوریج کے مسائل کو حل کرنا ناگزیر ہے جبکہ عوام کو صحت کی بہترین سہولیات تک سہل رسائی کیلئے مریم نواز ہیلتھ کلینکس بنائے جارہے ہیں۔ سرکاری ہسپتالوں میں ادویات کی لسٹ واضح آویزاں،عوامی شکایات کے ازالے کیلئے ڈی سی،اے سی کے نمبرز آویزاں کروائے۔
انہوںنے کہا کہ نجی سیکٹر کے تعاون سے ملتان میں 8 چوکوں پر یادگاریں بنائی جارہی ہیں، ایک یادگار کا افتتاح کیا جاچکا ہے جبکہ شہر کی خوبصورتی کیلئے 22 بس شیڈز، 18 سڑکوں کی اپ گریڈیشن کی جارہی ہے۔نادرن بائی پاس کو ماڈل روڈ بنایا جارہا ہے۔
کمشنر ملتان نے کہا کہ اداروں کی استعداد کار بڑھاتے ہوئے عوامی مسائل کو ہر ممکن طریقے سے حل کرنے کی کوشش کی جارہی ہے۔عام شہری کی آگاہی کیلئے ہر پبلک آفس میں حکومتی اقدامات بارے پینافلکس آویزاں کروائے گئے ہیں۔ کمشنر آفس، ڈپٹی کمشنرز آفس کے دروازے ہر شہری کیلئے کھلے ہیں۔ شہریوں کے مسائل حل کرنے اور انکی مکمل رہنمائی کرنے کے واضح احکامات دیئے ہیں۔ خود سرپرائز وزٹ کرکے شہریوں سے بات چیت کرتا ہوں تاکہ شہریوں کے مسائل اور انکے حل کا ادراک ہوسکے۔
وزیراعلی پنجاب مریم نواز کی جانب سے دیے پرفارمنس انڈیکیٹرز کو ہر صورت پورا کرنے کی کوشش کی جارہی ہے۔ ملتان میں ایگری مال کی تعمیر جلد مکمل ہوجائے گی۔وفد نے کمشنر ملتان عامر کریم خاں کو سونیئر بھی پیش کیا، نیز کمشنر ملتان ڈویژن عامر کریم خاں نے بھی وفد کو یاد گاری شیلڈ پیش کی ۔
