ویب نیوز: پنجاب میں ذہنی امراض کے شکار مریضوں کے لیے ایم آر آئی اور سی ٹی اسکین مشینوں کی خریداری کا منصوبہ تاخیر کا شکار ہوگیا۔
انسٹی ٹیوٹ آف مینٹل ہیلتھ لاہور میں ایم آر آئی اور سی ٹی اسکین مشینیں نصب کرنے کے منصوبے کے لیے 88 کروڑ روپے درکار ہیں، تاہم رواں مالی سال میں اس مقصد کے لیے صرف 10 کروڑ روپے مختص کیے گئے ہیں۔
مکمل فنڈز دستیاب نہ ہونے کے باعث انسٹی ٹیوٹ میں دونوں مشینوں کی خریداری اور تنصیب ممکن نہیں ہوسکے گی، جس کے باعث ذہنی امراض کے مریض ایم آر آئی اور سی ٹی اسکین کے لیے دیگر اسپتالوں کا رخ کرنے پر مجبور ہیں۔
ایگزیکٹو ڈائریکٹر ڈاکٹر عائشہ کے مطابق مشینوں کی خریداری کے لیے پروکیورمنٹ کا عمل شروع کردیا گیا ہے، امید ہے کہ آئندہ برس انسٹی ٹیوٹ آف مینٹل ہیلتھ میں جدید طبی مشینری نصب کردی جائے گی۔
