ملتان: جنوبی پنجاب کے وکلاءاور سائیلین کو دوسال کا طویل عرصہ گزرنے کے باوجود ہائیکورٹ ملتان بنچ میں وڈیو لنک کی سہولت فراہم نہیں ہوسکی.
طویل عرصہ سے احتجاج اور یقین دہانیوںکے باوجود ویڈیو لنک سہولت نہیںملنے پر وکلاء نے دوبارہ احتجاج کا اعلان کر دیا ہے.
وکلاء کے مطابق جنوبی پنجاب کے ہزاروں سائیلین کو اپنے مقدمات کی شنوائی کے لئے اسلام آباد جانا پڑتا ہے، جس میں پیسے کے ساتھ ساتھ وقت کا بھی بہت ضیاع ہوتا ہے۔
اس ضمن میں ہائیکورٹ بار ملتان کے سابق صدر سید ریاض الحسن گیلانی نے کہا ہے کہ ملتان کے وکلاء 27 جنوری کو ساڑھے گیارہ بجے ہائیکورٹ ملتان بینچ کے احاطے میں احتجاجی مظاہرہ کریں گے۔
انہوں نے کہا کہ ملتان کے وکلاء سپریم کورٹ کے مقدمات کی سماعت بذریعہ ویڈیو لنک کرانے کے لیے دو مرتبہ سپریم کورٹ آف پاکستان کے سامنے دھرنا دے چکے ہیں اس کے علاوہ ہائیکورٹ لاہور میں بھی انہوں نے دھرنا دیا تھا اور مذاکرات کے بعد چیف جسٹس لاہور ہائیکورٹ کی جانب سے یقین دہانی کرائی گئی تھی کہ یہ سہولت بہت جلد فراہم کر دی جائے گی مگر تین ماہ گزرنے کے باوجود اس پر عمل نہیں ہو سکا.
انہوں نے کہا کہ دو چیف جسٹسسز کے درمیان عدم تعاون کی وجہ سے مبینہ طور پر یہ مشکل پیدا ہو رہی ہے،جس کی وجہ سے جنوبی پنجاب کے ہزاروں وکلاء اور سائیلین کو پریشانی کا سامنا ہے.
