لاہور: پنجاب کے تمام اضلاع میں ڈسٹرکٹ اور ایڈیشنل ڈسٹرکٹ اینڈ سیشن ججز کو بطور جج خصوصی عدالت تعینات کر دیا گیا ہے.
گورنر پنجاب نے چیف جسٹس لاہور ہائی کورٹ کی مشاورت سے "پنجاب سپیشل کورٹس (اوورسیز پاکستانی پراپرٹی) ایکٹ 2025” کے تحت صوبے بھر میں خصوصی عدالتوں کے قیام کی منظوری دے دی ہے اور پنجاب کے تمام اضلاع میں ججز تعینات کر دیئے ہیں۔
اس ضمن میںباقاعدہ نوٹیفکیشن بھی جاری کرتے ہوئے فوری طور پر عدالتیںقائم کرنے کی ہدایت کی گئی ہے.
یہ عدالتیں اوورسیز پاکستانیوں کی جائیدادوں سے متعلق تنازعات، غیرقانونی قبضوں اور پراپرٹی کے حقوق کے تحفظ کے لیے قائم کی جا رہی ہیں۔ اس اقدام کا مقصد بیرونِ ملک مقیم پاکستانیوں کو ان کے قانونی مسائل کے حل کے لیے تیز رفتار، شفاف اور مؤثر انصاف کی فراہمی کو یقینی بنانا ہے۔
وائس چیئرپرسن اوورسیز پاکستانیز کمیشن پنجاب بیرسٹر امجد ملک کا کہنا ہے کہ خصوصی عدالتوں کا قیام، وزیرِاعلیٰ پنجاب کے شفاف اور انصاف پر مبنی گورننس وژن کی عملی تعبیر ہے.
