کوئٹہ: بلوچستان میں تمام 1500فلاحی تنظیموں اور اداروں کی رجسٹریشن ختم کردی گئی، فلاحی تنظیموں کو31 جولائی تک چیرٹیز اینڈ ریگولیشن اتھارٹی میں رجسٹریشن کی ہدایت کی گئی ہے.
بلوچستان کی چیرٹیز اینڈ ریگولیشن اتھارٹی نے محکمہ سماجی بہبود میں رجسٹرڈ تمام فلاحی تنظیموں اور اداروں کی رجسٹریشن منسوخ کردی۔
ڈائریکٹر جنرل بلوچستان چیرٹیز اینڈ ریگولیشن اتھارٹی سلیم کھوسہ نے بتایا کہ بلوچستان میں 1500 این جی اوز، فاؤنڈیشن، ٹرسٹ، مدارس، مساجد، ایسوسی ایشنز ، یونیز، کمیونٹی آرگنائزیشنز محکمہ سماجی بہبود میں رجسٹرڈ تھے لیکن اب ان تمام فلاحی تنظیموں اور اداروں کی رجسٹریشن منسوخ کردی گئی ہے۔
انہوں نے بتایا کہ اب ان فلاحی تنظیموں اور اداروں کو 31 جولائی تک دوبارہ بلوچستان چیرٹیز اینڈ ریگولیشن اتھارٹی میں رجسٹریشن کرانا ہوگی۔
ڈائریکٹر جنرل بلوچستان چیرٹیز اینڈ ریگولیشن اتھارٹی کا کہنا تھا کہ رجسٹریشن کے بغیر فنڈز وصول کرکے کام کرنے والی فلاحی تنظیموں اور اداروں کے خلاف کارروائی کے اختیارات ڈپٹی کمشنرز کے سپرد کردیئے گئے ہیں۔
انہوں نے خبردار کیا کہ خلاف ورزی کے مرتکب افراد کو ایک سال قید یا 20 لاکھ روپے جرمانہ دینا پڑسکتا ہے، دونوں سزائیں ایک ساتھ بھی دی جاسکتی ہے۔
سماجی تنظیموں کےلئے کام کرنےوالے افراد نے اس اقدام کو مایوس کن قرار دیا ہے، دوسری جانب شہری حلقوں نے اس عمل کو شفافیت اور احتساب کے لئے بہتر اقدام قرار دیا ہے.
