رحیم یار خان: گلشن اقبال میں 13 سالہ گھریلو ملازمہ مبینہ تشدد سے جاں بحق ہوگئی۔
ڈی پی او عرفان سموں کے مطابق 13 سالہ گھریلو ملازمہ سمیہ نواحی علاقے کوٹلہ پٹھان کی رہائشی تھی، سمیعہ گزشتہ 3 سال سے گلشن اقبال کے علاقے میں شہرام نامی شخص کے گھر پر ملازمہ تھی۔
عرفان سموں نے بتایا کہ بچی کی موت میاں بیوی کے تشدد سے ہوئی، موت کے بعد بچی کی والدہ کو گھر پر سمیعہ کی اچانک موت کی اطلاع دی گئی اور بچی کی لاش کو کفن میں لپیٹ کر رات کے اندھیرے میں ماں کے حوالے کیا گیا، بیٹی کی لاش گھر پہنچنے پر ماں نے دیکھا تو اس کے جسم پر تشدد کے نشانات موجود تھے۔
ڈی پی او کے مطابق بچی کی ماں نے پولیس کو اطلاع دی جس پر پولیس نے بروقت کارروائی کرتے ہوئے فرار ہونے والے ملزم میاں بیوی کو چھاپا مار کارروائی کے دوران گرفتار کرلیا۔پولیس نے روپوش ہونے کی کوشش کرنے والے شاطر ملزمان کو ٹیکنیکل مہارت کے ساتھ ٹریس کر کے گرفتار کیا.
پولیس کے مطابق گرفتار ملزمان میں شہرام بلال اور اس کی بیوی شامل ہیں، پولیس کو پکار 15 کے ذریعے 13/14 سالہ سمعیہ کے مبینہ قتل کی اطلاع ملی تھی.
ڈی پی او نے مزید بتایا کہ بچی کی لاش پوسٹ مارٹم کے بعد ورثا کے حوالے کردی گئی ہے ، ابتدائی میڈیکل میں بچی کے جسم پر سر سے پیروں تک بد ترین تشدد کے نشانات ملے ہیں۔
پولیس نے مبینہ مقتولہ کی والدہ کی مدعیت میں مقدمہ درج کر لیا ہے.
ڈی پی او عرفان علی سموں نے کہا ہے کہ مقدمہ کو میرٹ پر یکسو کیا جائے گا، نیز گرفتار ملزمان کو مضبوط کیس پیروی سے کیفر کردار تک پہنچایا جائے گا.
