بہاولپور: پنجاب کے ضلع بہاولپور میں 20 لاکھ روپے تاوان کی وصولی کیلئے گھر میں رکھا گیا بم نقلی ثابت ہو ا۔
پولیس ذرائع کے مطابق گورنمنٹ کوآپریٹو ہاؤسنگ کالونی میں گھروں کی تعمیر کرنے والے منور نامی شخص کے گھر میں بم رکھ کر بذریعہ خط 20 لاکھ روپے تاوان مانگا گیا تھا۔
پولیس کے مطابق بم کی اطلاع نامعلوم ذرائع سے بھیجے گئے خط کے ذریعےدی گئی اور خط کی تحریر میں طالبان کے نام پر 20 لاکھ روپے تاوان کا مطالبہ کیا گیا تھا، جبکہ رقم گھریلو ملازم کے ذریعے بھجوانے کا لکھا گیا تھا۔
پولیس کا بتانا ہےکہ گھر میں رکھے گئے بم کی اطلاع ملنے پر تمام ادارے متحرک ہوگئے، پولیس، سول ڈیفنس اور بم ڈسپوزل سکواڈ سمیت دیگر سکیورٹی ادارے موقع پر پہنچ گئے، تاہم چیک کرنے پر بم نقلی نکلا۔
پولیس کا بتانا ہے کہ بم میں صرف ریت بھری ہوئی تھی اور نقلی بم پر ڈیجیٹل سکرین بھی نصب کی گئی تھی، جس کے بعد پولیس نے برآمد شدہ نقلی بم قبضے میں لے کر مزید تحقیقات شروع کردی ہیں۔
