لاہور: پاکستان کرکٹ بورڈ (پی سی بی) نے پاکستان سپر لیگ (پی ایس ایل) کے آئندہ سیزن کے لیے انعامی رقم کا اعلان کر دیا۔پی سی بی کے مطابق ایچ بی ایل پی ایس ایل 10 جیتنے والی ٹیم کو 5 لاکھ امریکی ڈالر (تقریباً ساڑھے 14 کروڑ روپے) انعام دیا جائے گا جبکہ
رنر اپ ٹیم کو 2 لاکھ امریکی ڈالر (تقریباً 5 کروڑ 61 لاکھ روپے) ملیں گے ۔
پی سی بی کے مطابق پی ایس ایل کے دسویں ایڈیشن کا آغاز کل راولپنڈی کرکٹ سٹیڈیم میں منعقدہ شاندار افتتاحی تقریب سے ہوگا۔کل پہلا میچ دفاعی چیمپئن اسلام آباد یونائیٹڈ اور لاہور قلندرز کے درمیان کھیلا جائےگا۔
34 میچوں پر مشتمل یہ ٹورنامنٹ 6 ٹیموں کے درمیان 18 مئی تک جاری رہے گا۔ لاہور کے قذافی سٹیڈیم میں 13 میچز ہوں گے، جن میں دونوں ایلیمینیٹرز اور فائنل شامل ہیں۔
راولپنڈی کرکٹ سٹیڈیم 11 میچز کی میزبانی کرے گا، جن میں 13 مئی کو پہلا کوالیفائر بھی شامل ہے جبکہ کراچی کے نیشنل بینک سٹیڈیم اور ملتان کرکٹ سٹیڈیم میں پانچ، پانچ میچز ہوں گے۔
ٹورنامنٹ میں تین ڈبل ہیڈرز (ایک دن میں دو میچز) بھی شامل ہوں گے، جن میں سے دو ہفتہ کے دنوں اور ایک یوم مزدور (یکم مئی) کو کھیلے جائیں گے۔
بابر اعظم، شاداب خان، محمد رضوان اور شاہین شاہ آفریدی بالترتیب گزشتہ سال کی طرح پشاور زلمی، اسلام آباد یونائیٹڈ، ملتان سلطانز اور لاہور قلندرز کی قیادت کرتے رہیں گے جبکہ کراچی کنگز اور کوئٹہ گلیڈی ایٹرز نئےکپتانوں ڈیوڈ وارنر اور سعود شکیل کی قیادت میں میدان میں اتریں گے۔
گزشتہ سیزن2024 میں اسلام آباد یونائیٹڈ نے تیسری بار ٹائٹل اپنے نام کیا تھا جبکہ ملتان سلطانز لگاتار تیسری بار رنر اپ رہی تھی۔
دریںاثناء پاکستان کرکٹ بورڈ (پی سی بی) نے جنوبی افریقی کرکٹر کوربن بوش کے ایک سال تک پاکستان سپر لیگ (پی ایس ایل) کھیلنے پر پابندی عائدکردی۔
کوربن بوش نے پاکستان سپر لیگ کے ساتھ معاہدے کی خلاف ورزی کی تھی۔ انہوں نے معاہدے کے باوجود بھی پی ایس ایل کھیلنے سے انکار کیا تھا۔ کوربن بوش نے پی ایس ایل پر ایک اور لیگ کو ترجیح دی تھی۔
پی سی بی کے مطابق کوربن بوش پاکستان سپر لیگ کا اگلا ایڈیشن کھیلنےکے اہل نہیں ہوں گے۔ جنوبی افریقی آل راؤنڈر پر مالی جرمانہ بھی عائد کیا گیا ہے۔جس کے لئے پی ایس ایل کنٹریکٹ کی خلاف ورزی، آل راؤنڈر کوربن بوش کو قانونی نوٹس بھیج دیا گیا، پاکستان کرکٹ بورڈ نے نان ڈسکلوزر ایگریمنٹ کی وجہ سے جرمانےکی رقم بتانے سےگریز کیا ہے۔
دوسری جانب آل راؤنڈر کوربن بوش نے پی سی بی کی عائد کردہ سزا اور جرمانہ قبول کرلیا ہے۔ کوربن بوش کا کہنا ہےکہ میں اپنے کیے پر شرمندہ اور پاکستانی فینز سے معذرت خواہ ہوں، پشاور زلمی کے فینز کو مایوس کرنے پر معافی مانگتا ہوں، اپنے عمل کی تمام تر ذمہ داری اور اس پر سزا کو قبول کرتا ہوں۔
