ملتان: نیو شاہ شمس کالونی کے مکینوں کے لیے محسنِ ملتان، چوہدری ذوالفقار علی انجم کی کاوشوں سے صاف پانی کی فراہمی کا منصوبہ مکمل کر لیا گیا، جس کے تحت آر او پلانٹ کو فعال کر دیا گیا ہے۔ شہریوں نے چوہدری ذوالفقار علی انجم، چیئرمین ایس ایم گروپ آف انڈسٹریز، کو ان کی فلاحی خدمات پرخراجِ تحسین پیش کیا۔
آر او پلانٹ منصوبے کے انچارج زین خان ملغانی کے مطابق، عوام اپنی ضروریات کے مطابق یہاں سے مفت پانی حاصل کر سکتے ہیں۔ انہوں نے مزید کہا کہ ملتان میں عوامی فلاح و بہبود کے منصوبوں میں چوہدری ذوالفقار علی انجم اور ضلعی انتظامیہ کا کلیدی کردار رہا ہے۔ نیو شاہ شمس کالونی میں تعمیر کردہ اس پلانٹ کا سول ورک معیاری اور جدید ترین ٹیکنالوجی پر مبنی ہے، تاکہ آنے والی نسلیں بھی اس فی سبیل اللہ منصوبے سے مستفید ہوتی رہیں۔آر او واٹر پلانٹ کا باقاعدہ افتتاح ضلعی انتظامیہ کی موجودگی میں جلد ہی کیا جائے گا۔
محسنِ ملتان چوہدری ذوالفقار علی انجم کا کہنا ہے کہ ٹیکنالوجی کا درست استعمال وقت کی اہم ضرورت ہے۔ ہمیں ایسے ہنر مند افراد تیار کرنے چاہئیں جو جدید ٹیکنالوجی کو نہ صرف سمجھیں بلکہ اسے مؤثر انداز میں استعمال کرنے کی مہارت بھی رکھتے ہوں، کیونکہ یہی راستہ ملک کی ترقی اور خوشحالی کی جانب لے جائے گا۔
نیو شاہ شمس کالونی کے مکینوں سے مخاطب ہوتے ہوئے ذوالفقارانجم نے کہا کہ آر او واٹر پلانٹ ان کے لیے ایک قیمتی اثاثہ ہے، جس کی حفاظت اور دیکھ بھال ان کی اپنی ذمہ داری ہے۔ پانی اللہ کی ایک بڑی نعمت ہے، اس لیے اس کی قدر کرنا ہم سب پر لازم ہے۔
چوہدری ذوالفقار علی انجم نے آر او واٹر کے فوائد پر روشنی ڈالتے ہوئے کہا کہ جدید آر او (ریورس اوسموسس) ٹیکنالوجی کے ذریعے پانی میں موجود جراثیم، بیکٹیریا، وائرس، کیمیکلز اور دیگر آلودگیوں کو مؤثر انداز میں ختم کیا جاتا ہے، جو انسانی صحت کے لیے نقصان دہ ہو سکتی ہیں۔ یہ سسٹم پانی میں سے سیسہ (Lead)، آرسینک، پارا اور دیگر بھاری دھاتوں کو نکال کر اسے محفوظ اور صحت بخش بناتا ہے، کیونکہ یہ زہریلی دھاتیں مختلف بیماریوں کا سبب بن سکتی ہیں۔ مزید برآں، آر او ٹیکنالوجی خاص طور پر نمکین پانی کو صاف اور قابلِ استعمال بنانے کے لیے نہایت مفید ہے۔ اس فلٹریشن سسٹم کے ذریعے پانی کا ذائقہ بہتر ہو جاتا ہے، کیونکہ غیر ضروری نمکیات اور بدبو پیدا کرنے والے اجزاء کو مؤثر طریقے سے دور کر دیا جاتا ہے۔ نتیجتاً، صاف اور فلٹر شدہ پانی پینے سے بیماریوں کے امکانات کم ہو جاتے ہیں اور مجموعی صحت میں بہتری آتی ہے۔ آج یہاں کے مکینوں کے لئے ایک نوید اور ہے.
چوہدری ذوالفقار علی انجم نے کالونی میں مختص پلاٹ پر جامع مسجد کی تعمیر کے عزم کا اظہار کیا ہے، جس کے لیے ضلعی انتظامیہ سے اجازت حاصل کی جائے گی۔ مسجد کے ساتھ ایک کمیونٹی ہال اور ڈسپنسری کی تعمیر بھی منصوبے میں شامل ہے۔
مکینوں نے مطالبہ کیا ہے کہ انتظامیہ عوامی مفاد میں اس نیک کام کی اجازت دے، تاکہ علاقے میں ایک خوبصورت اور عالیشان مسجد کی تعمیر کا آغاز ممکن ہو سکے۔
