لاہور : پنجاب حکومت نے صوبے میں کچرا ٹھکانے لگانے کے جدید منصوبے کا آغاز کردیا۔ پنجاب میں کچرا جمع کرنے کے لیے رنگدار کوڑے دان استعمال کرنے کے حکم سے متعلق ماحولیاتی تحفظ کے ادارے نے باضابطہ نوٹیفکیشن جاری کردیا ہے۔
نوٹیفکیشن کے مطابق منصوبے کے تحت پہلے مرحلے میں تعلیمی اداروں میں اسمارٹ ویسٹ مینجمنٹ پراسیس کی منظوری دی گئی ہے اور اس کے لیے سرکاری اور نجی درس گاہوں میں 5 رنگ کے کوڑے دان رکھے جائیں گے۔
منصوبے کے تحت پیلے رنگ کے ڈبوں میں کاغذ اور ردی جمع کی جائے گی جبکہ سبز ڈبوں میں بوتلیں، کانچ کے ٹکڑے، لیبارٹری کا ضائع شدہ سامان ڈالا جائے گا۔سُرمئی ڈبے میں پھلوں کے چھلکے، ضائع شدہ کھانا، پتے اور گلی سڑی سبزیاں پھینکی جائیں گی جبکہ لال رنگ کے کچرے کے ڈبے لوہے اور دیگر دھاتی کوڑے کے لیے استعمال ہوں گے، نارنجی ڈبے پلاسٹک ویسٹ کے لیے استعمال کیے جائیں گے۔
نوٹیفکیشن کے تحت تمام سکولوں میں رنگوں والے کوڑے دان لگانے کیلئے 30 ستمبر کی ڈیڈ لائن مقرر کی گئی ہے اور یکم اکتوبر سے رنگدار کوڑے دان نہیں رکھنے پر جرمانے ہوں گے۔ حکام کے مطابق الگ الگ رنگ کے کچرے کے ڈبوں میں الگ الگ قسم کا کوڑاکرکٹ جمع کیاجائے گا، جدید طریقے کا مقصد کچرے کی مقدار میں کمی لانا اور ماحول دوست رویوں کو فروغ دینا ہے۔
کوڑا کرکٹ کی اشیاء کو دوبارہ استعمال کے قابل بنانے کے لیے جمع کیا جائے گاجبکہ تعلیمی ادارے کچرے کو اٹھانے کے لئے پنجاب مینجمنٹ ہیلپ لائن 1139پر رابطہ بھی کر سکتے ہیں۔
اس سے قبل ملتان سمیت پنجاب کے مختلف بڑے شہروں میں مختلف رنگوں کے کوڑا دان رکھ کر شہریوںکو شیشہ، پلاسٹک کی اشیاء اور کوڑا علیحدہ علیحدہ تین رنگوں کے ڈبوں میں ڈالنے کی ہدایت کی گئی تھی، تاہم یہ منصوبہ عوامی عدم دلچسی کی وجہ سے ناکام ہو گیا.
