ملتان:بھارت نے دریائے ستلج میں مزید پانی چھوڑے جانے کے حوالے سے پاکستان کو آگاہ کردیا۔پاکستان میں بھارتی ہائی کمیشن نے دریائے ستلج میں سیلابی پانی چھوڑنے سے متعلق پاکستان کو اطلاع دی۔
وزارت آبی وسائل کے سیلاب سے متعلق جاری الرٹ کے مطابق دریائے ستلج میں ہریکے زیریں، فیروزپور زیریں پر اونچے درجے کا سیلاب ہے۔دریائےستلج میں پانی کے بہاؤ میں مزید اضافے کا خدشہ ہے۔
ڈی جی پی ڈی ایم اے نےہدایت کی کہ شہریوں کی جان ومال کےتحفظ کو یقینی بنایاجائے۔ لاہور میں پریس کانفرنس کرتے ہوئے ڈی جی پی ڈی ایم اے نے کہا کہ اب ستلج میں پانی کا بہاؤ بہت زیادہ نہیں ہے، گنڈا سنگھ اور راوی میں پانی کم ہورہا ہے، ہیڈ محمد والا اور شیر شاہ پر بڑا خطرہ نہیں لیکن وہاں پر پانی کم نہیں ہو رہا ہے۔
دوسری جانب بند ٹوٹنے کے خطرے کے باعث ملتان کی تحصیل جلالپور پیروالا شہرکو خالی کرنےکا حکم دے دیا گیا ہے۔
سی پی او صادق علی ڈوگر کے مطابق پانی کا دباؤ بہت زیادہ بڑھ چکا ہے، چناب کا پانی شہرکے قریب بنائے جانے والے بند کو کسی بھی وقت توڑ سکتا ہے۔سی پی او کا کہنا ہے کہ شہری فوری طور پر مکانات خالی کرکےمحفوظ مقامات پر منتقل ہوجائیں۔ پولیس کی جانب سے شہر خالی کرنے کے لیے جلالپور پیروالا کی مساجد میں اعلانات بھی کیے جارہے ہیں۔
صادق علی ڈوگر کے مطابق لوگوں کو ریسکیو کرنے کے لیے 5 تھرمل ٹیکنالوجی ڈرون منگوائے ہیں، تحصیل جلالپور کے لئے 50 کشتیاں مزید منگوائی گئی ہیں۔
سی پی او کا کہنا ہے کہ توقع ہے آج رات پھنسے تمام افراد کو محفوظ مقامات پر منتقل کردیا جائےگا۔
خیال رہے کہ بھارت کی جانب سے پاکستان کو سیلاب سے متعلق نئی معلومات فراہم کرنے کے بعد پنجاب میں اونچے درجے کے سیلاب کا الرٹ جاری کر دیا گیا ہے جبکہ جلال پور پیر والا میں سیلاب کے باعث صورتحال خراب ہونے کے بعد پاک فوج کو مدد کے لیے طلب کر لیا گیا ہے۔
اس طرح ملتان کے شیر شاہ فلڈ بند کے اندر موجود درجنوں بستیوں میں کھڑے پانی کے باعث مکانات گرنا شروع ہو گئے ہیں جبکہ بارش کے باعث سیلاب متاثرین کی مشکلات میں مزید اضافہ ہو گیا ہے۔
