نمائندگان: بلوچستان کے ضلع ژوب کے علاقے سلیازہ میں سیلابی ریلے نے دو گاڑیوں کو بہا لیا جس کے نتیجے میں ملتان سےتعلق رکھنے والے ایک ہی خاندان کے چار افراد جاں بحق ہوگئے۔
ہسپتال ذرائع کے مطابق جاں بحق افراد میں ایک خاتون، دو جوان لڑکیاں اور ایک چھوٹی بچی شامل ہیں جبکہ تمام افراد کا تعلق ملتان سے تھا اور ان کی لاشیں ژوب کے ٹراما سینٹر منتقل کر دی گئیں۔
لیویز فورس کے مطابق ایک اور خاتون کو سیلابی ریلے سے زندہ نکال کر ہسپتال منتقل کیا گیا جبکہ ریسکیو آپریشن میں لیویز فورس اور مقامی لوگوں نے حصہ لیا جو بدستور جاری ہے ۔
تفریحی پوائنٹ سلیازہ ضلع ژوب سے مشرق کی طرف 13 کلومیٹر کے فاصلے پر واقع ہے، جاں بحق ہونے والے افراد کا تعلق ایک ہی خاندان سے ہے پکنک منانے سلیازہ آئے تھے.
ہرنائی میں بھی سیلابی ریلے نے تباہی مچائی جہاں تین افراد سیلاب میں پھنس گئے تھے۔
ڈپٹی کمشنر ہرنائی ولی کاکڑ کے مطابق لیویز فورس نے کامیاب ریسکیو آپریشن کرتے ہوئے تینوں افراد جن کی شناخت حضرت سید، ذیشان، اور ریحان کے نام سے ہوئی کو بحفاظت نکال لیا۔
ہرنائی کے علاقہ کھوسٹ میںمذکورہ واقعہ پیش آیا، جہاں پہاڑی سلسلوں میں طوفانی بارش ہوئی، نیز بارش کے بعد زردآلو کھوسٹ ندی میں اونچے درجے کا سیلابی ریلہ آیا.
خیبرپختونخوا کے ضلع صوابی میں شدید بارشوں کے باعث ندی نالوں میں طغیانی آگئی اور آدینہ خوڑ میں سیلابی صورتحال کے نتیجے میں چار افراد، جن میں دو خواتین اور دو بچے شامل تھے، پھنس گئے۔
ریسکیو 1122 کے کنٹرول روم کو اطلاع ملتے ہی ایمرجنسی ڈیزاسٹر ٹیم موقع پر پہنچی اور تمام پھنسے ہوئے افراد کو بحفاظت نکال کر محفوظ مقام پر منتقل کر دیا۔
حکام نے شہریوں سے اپیل کی ہے کہ وہ سیلابی ریلوں کے خطرے کے پیش نظر ندی نالوں کے قریب جانے سے گریز کریں اور حفاظتی ہدایات پر عمل کریں تاکہ جانی نقصان سے بچا جا سکے۔
