نمائندگان: شیخوپورہ میں غیرملکی فوڈ چین (کے ایف سی)کے آؤٹ لیٹ ریسٹورنٹ پر گزشتہ شب مسلح افراد نے حملہ کیا اور کچن میں گھس کر کی گئی فائرنگ سے ایک شخص جاں بحق ہوگیا۔
پولیس کے مطابق لاہور بائی پاس چوک میں واقع بین الاقوامی فوڈچین کے ہوٹل میں گزشتہ رات 2 نامعلوم موٹرسائیکل سواروں نے فائرنگ کرکے ہوٹل ملازم آصف نواز کو قتل کر دیا تھا اور فائرنگ کرتے ہوئے فرار ہو گئے تھے۔
پولیس کا کہنا ہے کہ حملہ آوروں کی فائرنگ سے ہوٹل کے شیشے بھی ٹوٹ گئے تھے، مقتول آصف نواز کی عمر 45 سال تھی جو بستی خان کالونی کا رہائشی تھا، پولیس کے مطابق آصف نواز چھٹی پر ہونے کے باوجود رات کو یہاں پہنچا، وہ فوڈ چین کے دروازے پر کھڑا تھاکہ فائرنگ ہوگئی جس سے وہ زخمی ہو گیا، وہ فوڈ چین کے اندر کی طرف بھاگا مگر جاں بَر نہیں ہوسکا۔مقتول کی لاش کا پوسٹمارٹم کرکے ورثا کے حوالے کر دی گئی جسے نماز جنازہ کے بعد مقامی قبرستان میں سپردِ خاک کر دیا گیا۔
دوسری جانب تھانہ ہاؤسنگ کالونی پولیس نے 2 نامعلوم ملزموں کے خلاف ایس ایچ او کی مدعیت میں مقدمہ درج کر لیا، مقدمے میں قتل اور ہوٹل پر حملے سمیت انسداد دہشت گردی ایکٹ کی دفعات شامل کی گئی ہیں۔ پنجاب فارنزک اور پولیس کرائم سین کی ٹیموں نے شواہد اکٹھے کرکے ملزموں کی تلاش شروع کر دی۔
ڈی پی او شیخوپورہ بلال ظفر نے بتایا کہ فوڈ چین کے باہر مظاہرے کیے گئے جن میں اسے بند کرنے کا مطالبہ کیا گیا تھا، پولیس نے فوڈ چین میں قتل کے بعد 25 سے زائدمشتبہ افراد حراست میں لے لیے، ان میں سے زیادہ تر کا تعلق ایک مذہبی جماعت سے ہے، مظاہرے میں متحرک اور اشتعال دلانے والوں پر بھی نظر ہے۔
دوسری جانب چیئرمین اسلامی نظریاتی کونسل علامہ راغب نعیمی کا کہنا ہےکہ اسرائیلی مصنوعات اور کمپنیوں کا معاشی بائیکاٹ کرنا ضروری ہے لیکن معاشی بائیکاٹ میں عام شہریوں کی جان و مال اور املاک کو نقصان نہیں پہنچایا جائے۔
ایک بیان میں چیئرمین اسلامی نظریاتی کونسل علامہ راغب نعیمی کا کہنا تھا اسرائیل کے مجرمانہ اقدامات کی مذمت کرتے ہیں۔ ان مجرمانہ اقدامات کو روکنے میں حسب استطاعت اپنا کردار ادا کرنا لازم ہے۔
خیال رہے کہ قبل ازیںکراچی، میر پور اور راولپنڈی میںبھی کے ایف سی آؤٹ لیٹریسٹورینٹس پر حملے ہو چکے ہیں.
