کوئٹہ: بلوچستان کے ضلع زیارت کے علاقے میں نامعلوم مسلح افراد نے اسسٹنٹ کمشنر زیارت افضل باقی کو بیٹے سمیت اغواء کرلیا۔
ڈپٹی کمشنر زیارت ذکاء اللہ درانی کے مطابق اسسٹنٹ کمشنر زیارت محمد افضل باقی اپنے بیٹے منتصر باللہ کے ساتھ زیارت کے سیاحتی مقام زرزری گئے تھے جہاں علاقے میں نامعلوم مسلح افراد نے انہیں اہلخانہ اور ملازمین سمیت اغواء کرلیا۔
ذکا اللہ درانی نے بتایا کہ مسلح افراد نے افضل باقی کے اہل خانہ کو بحفاظت چھوڑ دیا جبکہ ان کے گن مین اور ڈرائیور کو بھی کچھ فاصلے پر رہا کر دیا گیا۔ تاہم اغواء کرنے والے مسلح افراد نے اسسٹنٹ کمشنرکی سرکاری گاڑی نذر آتش کردی۔
واقعے کی اطلاع ملتے ہی لیویز فورس اور دیگر قانون نافذ کرنے والے اداروں کے اہلکار موقع پر پہنچ گئے اور اے سی زیارت اور ان بیٹے کی بازیابی کیلئے سرچ آپریشن شروع کردیا۔
ڈپٹی کمشنر کے مطابق افضل باقی اور ان کے بیٹے کی بازیابی کے لیے تفتیش مختلف پہلوؤں سے جاری ہے۔
اسسٹنٹ کمشنر افضل باقی دو ماہ بعد سرکاری ملازمت سے ریٹائر ہونے والے ہیں۔
