اسلام آباد:وزیرِ اعظم محمد شہباز شریف نےچین میں زرعی شعبے کی تربیت کیلئے بھیجے جانے والے طلباء کے انتخاب میں شفافیت اور میرٹ کو اولین ترجیح دینے کی ہدایت کی ہے.وزیرِ اعظم کی جانب سےپورٹل کے ذریعے درخواستوں کی سکروٹنی کے دوران سلیکشن کے معیار پر پورا نہیں اترنے والے طلباء و طالبات کی شکایات کے اذالے کیلئے کمیٹی بنانے کی ہدایت کی گئی ہے.
وزیراعظم پاکستان کا کہنا ہےکہ چین پاکستان کا دیرینہ دوست ہے جس کی زرعی شعبے میں ترقی بے مثال ہے.اپنے دورہ چین کے دوران چینی قیادت سے زرعی شعبے میں پاکستانی طلباء کی جدید تربیت کی درخواست کی تھی.پاکستانی طلباء و طالبات کی چین میں جدید زرعی تربیت کا پورا خرچ حکومت پاکستان اٹھائے گی.اللہ کے فضل و کرم سے بہت جلد طلباء و طالبات کا پہلا بیچ زراعت کے شعبے میں جدید تربیت کیلئے چین روانہ ہوگا.زرعی شعبے کی جدید تربیت کیلئے چین جانے والے طلباء و طالبات میں 10 فیصد خصوصی کوٹہ بلوچستان کے طلباء کیلئے مختص کیا گیا.چینی قیادت اور چینی یونیورسٹیوں کے شکر گزار ہیں کہ انہوں نے پاکستانی طلباء کو چین میں زراعت کی جدید تربیت کا موقع دیا.
وزیرِاعظم محمد شہباز شریف نے چین میں جدید زراعت کی تربیت کے حصول کیلئے جانے والے پاکستانی طلباء و طالبات کے حوالے سے جائزہ اجلاس کی آج اسلام آباد میں صدارت کی.اجلاس میں وزیرِ اعظم کو بتایا گیا کہ زرعی شعبے سے تعلق رکھنے والے طلباء و طالبات نے شفاف طریقے سے پورٹل کے ذریعے درخواستیں جمع کروائیں.1287 درخواستوں میں سے 711 طلباء و طالبات تربیت کے طے کردہ معیار پر پورے اترے. ان طلباء و طالبات میں بلوچستان اور گلگت بلتستان کے امیدوار بھی شامل ہیں.اجلاس کو مزید بتایا گیا کہ ان طلباء و طالبات کو دو بیچز میں چین بھیجا جائے گا.پہلی کھیپ میں 300 طلباء و طالبات آبپاشی میں بہتری، مویشیوں میں بیماریوں کی تشخیص و نگرانی،مویشیوں کی افزائش نسل و جدید جینیات اور جدید بیجوں کی تیاری و انکی پراسیینگ کے شعبوں میں تربیت کیلئے بھیجا جائے گا.طلباء و طالبات کی پہلی کھیپ مارچ 2025ءمیں چین روانہ ہوگی.اجلاس کو مزید آگاہ کیا گیا کہ 400 طلباء کی دوسری کھیپ رواں برس کے وسط میں چین بھیجی جائے گی،جو زراعت میں جدید مشینری کے استعمال،فصلوں کی تیزی سے افزائش،زراعت میں جدید ٹیکنالوجی بشمول مصنوعی ذہانت کا استعمال اور پھلوں و سبزیوں کی پراسیسنگ کے شعبوں میں تربیت دی جائے گی.
اجلاس میں وفاقی وزراء احسن اقبال،رانا تنویر حسین،احد خان چیمہ،چیئرمین ہائر ایجوکیشن کمیشن اور متعلقہ اعلیٰ حکام نے شرکت کی.
