ملتان: پاکستان پیپلز پارٹی کے سینیئر رہنما و ہائیکورٹ بار کے سابق صدر حبیب اللہ شاکر نے کہا ہے کہ معاشرے میں خواتین کا استحصال کرنے کا کوئی موقع نہیں چھوڑا جاتا، جس کی وجہ سے بالخصوص دیہی علاقہ کے خواتین زیادہ محرومیت کا شکار ہیں.
ڈسٹرکٹ بار ایسوسی ایشن ملتان میں خواتین کے حقوق کے حوالے سے منعقدہ تقریب سے خطاب میںان کا مزید کہنا تھا کہ وزیراعظم شہید بے نظیر بھٹو نے خواتین کے حقوق کے لیے بھرپور کردار ادا کیا، پاکستان بھر کی خواتین انتہائی مظلوم و محکوم ہیں،جن کے مسائل کے حل کے لیے ہمیں بھرپور انداز میں ذمہ داری کا مظاہرہ کرنا چاہیے.
ممبر پاکستان بار کونسل مرزا عزیز اکبر بیگ، سینیئر وکلاء نشید عارف گوندل، اقبال سرگانہ، بشریٰ نقوی، رانا جاوید اختر، سید عارف شاہ، زوار حسین قریشی، منظور قادری، رضوان ہانس، اشفاق احمد، عدنان حیدری اور بابر سوئیکارنو نے بھی خطاب کیا.
مقررین نے کہا کہ ہماری سوسائٹی میں خواتین انتہائی استحصال کا شکار ہیں، مرد اس پر حکمرانی کرتا ہے اور ظلم بھی کرتا ہے.افسوس ناک صورتحال یہ ہے کہ خواتین پر ہونے والے مظالم کا واویلا تو بہت کیا جات ہے، مگر عملی طور پر ان کے حقوق کے لیے کوئی جدوجہد نہیں کرتا، جس کی وجہ سے ان میں شدید احساس محرومی پایا جاتا ہے، اس لئے ہم سب کو خواتین کے حقوق کے لیے بھرپور کردار ادا کرنا چاہیے۔
