لاہور: وزیراعلیٰ پنجاب مریم نواز نے تحصیل تونسہ میں ایڈز کے سدباب کے لیے آپریشنل پلان طلب کر لیا۔وزیر اعلیٰ پنجاب کی ہدایت پر متاثرہ علاقوں میں ہاؤس ہولڈ سکریننگ بھی کی جائے گی –
ہسپتال انتظامیہ کےمطابق تونسہ میں مزید ایک بچے میں ایچ آئی وی وائرس کی تصدیق ہوئی ہے، جس کے بعد متاثرہ بچوں کی تعداد 107 ہوگئی جبکہ ہسپتال میں روزانہ بچوں سمیت لوگوں کی سکریننگ کی جارہی ہے۔
دوسری جانب وزیراعلیٰ مریم نواز کی ہدایت پر یونیسیف، ڈبلیو ایچ او اور محکمہ ہیلتھ پنجاب کا جوائنٹ مشن قائم کیا گیا ہے جو ایڈز کنٹرول اور بچاؤ کے لیے تجاویز پیش کرے گا۔
جوائنٹ مشن 7 اپریل سے 14 اپریل تک متاثرہ بچوں کی ہسٹری ٹریسنگ کرے گا، ادھر متاثرین کے مطابق ایڈز کنٹرول پروگرام کی جانب سے ادویات بھیج دی گئی ہیں لیکن عملہ نہیں پہنچ سکا ہے، اس لئے ہسپتال سٹاف اور ڈاکٹرز ہی ایچ آئی وی مریضوں کی دیکھ بھال کر رہے ہیں، ہسپتال زرائع کے مطابق ایڈز کنٹرول پروگرام کے عملے کے آنے کے بعد الگ وارڈ قائم ہوگا۔
تحصیل ہیڈ کوارٹرز ہسپتال تونسہ اور دیگر طبی مراکز میں ایڈز کے علاج کیلئے خصوصی مراکز قائم کر دیا گیاہے، وزیر اعلیٰ مریم نواز شریف کی جانب سے ایڈز سے متاثرہ بچوں کے مکمل مفت علاج کی ہدایت بھی کی گئی ہے.
مزید برآں مریم نواز کا کہنا ہے کہ ایڈز سے متاثرہ بچوں کے علاج میں کوئی کمی یا کوتاہی برداشت نہیں کی جائے گی۔وزیر اعلیٰ کی جانب سے ، ایڈز پھیلاؤ کے اسباب اور ذمہ داروں کا تعین کرنے کی ہدایت کے ساتھ ایڈز کے رسک پر موجود پاپولیشن کے بچاؤ کے لئے مؤثر اور ٹھوس اقدامات کا حکم بھی دیا گیا ہے.
