اسلام آباد: سپریم کورٹ نے عوامی سہولت کے لئے نیا پورٹل لانچ کر دیا۔
چیف جسٹس پاکستان یحییٰ آفریدی کی ہدایت پر جدید پبلک فیسلیٹیشن پورٹل تیار کیا گیا۔
اعلامیہ کے مطابق پبلک پورٹل کا لنک سپریم کورٹ کی ویب سائٹ پر دستیاب ہے ۔ جہاں شہری عدالتی معلومات آسانی سے حاصل کر سکیں گے، نیز کیسز کی معلومات اب نام ، نمبر یا درخواست سے دستیاب ہوں گی ۔
ہیلپ لائن ون ایٹ ون ایٹ پر سپریم کورٹ سے براہ راست رابطہ بھی ممکن ہو گیا ۔ ’’اکثر پوچھے جانے والے سوالات‘‘سیکشن میں عدالتی اصطلاحات کی وضاحت موجود ہے۔ ’’ایپلیکیشن اسٹیٹس‘‘ کے سیکشن میں درخواستوں کی رئیل ٹائم نگرانی ہو سکے گی ۔
ابتدائی سماعت ، التواء اور ویڈیو لنک درخواستوں کی پیش رفت بھی آن لائن دستیاب ہو گی۔
اس طرح اوورسیز پاکستانی بھی اب آن لائن اپنے کیسز کی نگرانی کر سکیں گے۔
وکلاء کے مطابق نئے پورٹل سے سائلین اور وکلاء کو اپنےمقدمات سے متعلق سہولیات بآسانی دستیاب ہونے کے ساتھ وقت اور پیسے کی بھی بچت ممکن ہو گی.
