لاہور: چیف جسٹس لاہور ہائیکورٹ جسٹس مس عالیہ نیلم کے ساتھ بار ایسوسی ایشنز کے عہدیداروں کی ملاقات میںعدالتی اقدامات پر تبادلہ خیال کیا گیا.
ملاقات میں لاہور ہائیکورٹ بار ایسوسی ایشن کے صدر ملک آصف نسوانہ، ہائیکورٹ بار ایسوسی ایشن راولپنڈی کے صدر احسن حمید اللہ، ڈسٹرکٹ بار ایسوسی ایشن ملتان کے صدر ملک جاوید ڈوگر، ہائیکورٹ بار ایسوسی ایشن بہاولپور کے صدر چودھری ندیم اقبال موجود تھے. ملاقات میں وکلاء برادری کے مسائل، عدالتی اصلاحات اور انتظامی امور پر تبادلہ خیال کیا گیا.
چیف جسٹس عالیہ نیلم نے ہائیکورٹ بار ایسوسی ایشنز کے صدور کو عدالتی اصلاحات اور نئے ایس او پیز سے متعلق بریفنگ دیتے ہوئے بتای کہ وکلاء رہنماؤں کی ذمہ داری ہے کہ وہ تمام وکلاء کو لاہور ہائیکورٹ کی جانب سے نافذ کی گئی اصلاحات اور ایس اوپیز سے متعلق آگاہی دیں.
چیف جسٹس لاہور ہائیکورٹ نے وکلاء رہنماؤں کو ضلعی عدلیہ میں کیس دائری کے نئے ایس او پیز کے بارے بتایا کہ سپریم کورٹ کے حکم پر ضلعی عدلیہ میں بوگس و جعلی مقدمات کی روک تھام کے لئے ایس او پیز مرتب کئے گئے ہیں، جس میںبوگس و کاغذات کے ذریعے سرکاری خزانے سے فراڈ ادائیگیوں کی روک تھام کے لئے مؤثر طریقہ کار اپنایا گیا ہے.
چیف جسٹس عالیہ نیلم کا کہنا تھا کہ تمام مقدمات کی انفارمیشن شیٹ کو ہر لحاظ سے مکمل کرنا لازمی قرار دیا گیا ہے، کیس انفارمیشن شیٹ پر مدعی و سائل کے دستخط یا نشانِ انگوٹھا کے ساتھ تصویر کی چسپاندگی لازمی قرار دی گئی ہے، اس طرح مدعی یا سائل کسی بھی جگہ سے بذریعہ ویب کیمرہ اپنی تصویر کی چسپاندگی یقینی بنائے گا اور انفارمیشن شیٹ پر مدعی یا سائل کا شناختی کارڈ نمبر اور موبائل نمبر بھی لازمی درج کیا جائے گا.
چیف جسٹس لاہور ہائیکورٹ نے لاہور ہائیکورٹ میں مقدمات کا بہت زیادہ بوجھ ہ بارے اظہار خیال کرتے ہوئےعدالتوں میں مقدمات کی کیٹیگری کے مطابق فائلنگ سسٹم سے متعلق بھی بریفنگ دی گئی.
چیف جسٹس لاہور ہائیکورٹ نے کہا کہ عدالت عالیہ میں نئے فائل کورز کا نفاذ جون 2025 سے ہوگا، جس کے لئے لاہور ہائیکورٹ میں کیس فائلنگ کے لئے استعمال ہونے والے فائل کورز میں تبدیلیاں کی گئی ہیں.
مقدمات کی نوعیت و ترجیح کے اعتبار سے مختلف رنگوں کے فائل کورز و سٹرپس بنوائے گئے ہیں، سول، فوجداری، فیملی، کمرشل مقدمات کے لئے الگ الگ رنگ کی ٹیپ والے فائل کورز بہت جلد مارکیٹ میں آ جائیں گے. اسی طرح رٹ پٹیشنز کے لئے بھی سب کیٹگریز کے مطابق مختلف رنگوں کی ٹیپ اور سٹرپ استعمال کی گئی ہےاورمقدمات کی ترجیح کے مطابق جلد سماعت کے لئے کاز لسٹ بھی مختلف رنگوں میں نکالی جائے گی.
چیف جسٹس لاہور ہائیکورٹ عالیہ نیلم نے بتایا کہ لاہور ہائیکورٹ کی موبائل ایپلیکیشن پر روزانہ کے مقدمات کی کاز لسٹ کو لائیو کردیا گیا ہے، اب وکلاء اور سائلین موبائل ایپ پر دیکھ سکیں گے کہ کونسی عدالت میں کونسا مقدمہ زیرِ سماعت ہے، اس طرح کاز لسٹ کی لائیو براڈکاسٹنگ کے لئے لاہور ہائیکورٹ کی تمام عدالتوں کے باہر ایل سی ڈیز بھی لگائی جائیں گی اور بہت جلد تمام اصلاحات کو نافذ کردیا جائے گا.
چیف جسٹس لاہور ہائیکورٹ عالیہ نیلم نے شرکاء سے اظہارِ خیال کرتے ہوئے کہا کہ وکلاء رہنماء بذریعہ نوٹس بورڈز اور واٹس ایپ گروپس عدالتی اصلاحات اور نئے ایس او پیز کے بارے وکلاء کو بریفنگ دیں.
اس موقع پررجسٹرار لاہور ہائیکورٹ امجد اقبال رانجھا بھی موجود تھےجبکہ چیف جسٹس لاہور ہائیکورٹ کے ساتھ ضلعی بار ایسوسی ایشن جھنگ کے وفد نے بھی ملاقات کی.
