نمائندگان: پاکستان پیپلزپارٹی کے رہنما نے پنجاب میں بلدیاتی انتخابات کرانے کامطالبہ کر دیا۔پریس کانفرنس کےجواب میں عظمیٰبخاری نے بھی بیان داغ دیا.
سینئرصوبائی وزیرسندھ شرجیل میمن نے کراچی پریس کانفرنس کرتے ہوئے کہا کہ پنجاب میں بلدیاتی انتخابات کیوں نہیں کروائےجارہے؟ہمیں ڈیڈ لائینز دی جا رہی تھیں کہ بلدیاتی انتخابات کروائیں،تمام صوبوں میں بلدیاتی انتخابات ہو چکے، پنجاب میں کیوں نہیں ہو رہے۔
شرجیل میمن نے کہا ملکی حالات کو دیکھیں،یہ نئی نئی باتیں نہ کریں،میرا پانی میری مرضی،میرا پیسہ مرضی یہ کونسی باتیں ہیں،آئین پاکستان اورپانی معاہدات کےبارے میں معلومات رکھنےوالے یہ باتیں نہیں کرتے،میں کہہ دوں کہ میری پورٹ میری مرضی،میرا کوئلہ میری مرضی، یہ سب کہوں گا تو مجھےمیری قیادت پارٹی سے نکال دےگی،نفرت کی آگ کو نہ پھیلائیں اپنے سپیچ رائٹرز کوشٹ اپ کال دیں،میرا تیرا نہیں، پورا پاکستان،وسائل، صوبے ہم سب کا ہے۔
مزیدکہا پنجاب حکومت نےپچھلےکچھ دنوں میں پیپلزپارٹی کیخلاف یکطرفہ مہم چلائی،پنجاب حکومت کی تنقید سمجھ سے باہر ہے،ہمیں ٹارگٹ بنا کر وفاقی حکومت کو نشانہ بنایا جا رہا ہے،اگرکسی کی لڑائی وزیراعظم سے ہےتو پیپلزپارٹی کو نہ گھسیٹا جائے،برائے مہربانی پیپلز پارٹی کو اس لڑائی میں شامل نہیں کریں۔
وزیر اطلاعات پنجاب عظمیٰ بخاری نےشرجیل میمن کے بیان پر ردعمل دیتے ہوئے کہا ہےپنجاب میں جب بھی بلدیاتی انتخابات ہونگے وہ کراچی جیسے بوگس نہیں ہونگے،اس لیے آپ اپنی ڈیڈ لائن اپنی جیب میں رکھیں۔
وزیر اطلاعات پنجاب عظمیٰ بخاری نےشرجیل میمن کومخاطب کرتے ہوئےکہا کہ آپ ہیں کون جو پنجاب کو حکم دیں گے ،اپنےحکم اور مشورے اپنی جیب میں رکھیں،اگر آپ مریم نوازکی مقبولیت سے خوفزدہ نہ ہوتے تو آج چھٹی کے روز بھی پریس کانفرنس کی ضرورت نہ ہوتی۔
وزیر اطلاعات پنجاب نےکہا پنجاب کےسیلاب متاثرین پر گندی سیاست کا آپکا بیانیہ ناکام ہوگیا ہے،اب وزیراعظم کےخلاف”پھپھے کٹنیوں“والا بیانیہ لےآئےہیں،آپکوپنجاب کےسیلاب متاثرین پرسیاست کرنے کے لئے وزیراعظم نےکہا تھا؟بلاول نے بطور وزیر خارجہ اپنی جماعت،وفاقی حکومت اور وزیراعظم کی جڑیں کھوکھلی کیں،جن کے اپنے گھر میں باپ بیٹےکی نہیں بنتی وہ ہمارے گھرمیں طعنے زئی کرکے اپنےگناہوں پرپردہ ڈالنا چاہتے ہیں۔
عظمیٰ بخاری نے مزیدکہاآپ اتنےبچےہیں کہ پنجاب حکومت آپکووفاق کیخلاف سازش کی طرف دھکیل رہی اورآپ اسکا حصہ نہیں بن رہے؟جب آپ پنجاب کی ترقی سے جلنے لگتے ہیں تب آپ سازشیں شروع کردیتے ہیں،جب آپ سے آپکی کارکردگی پوچھی جاتی ہے تو صوبائیت کارڈ کھیلنا شروع کر دیتے ہیں،
انہوں نےکہا میرا پانی میری مرضی بالکل ایسےہی ہے جیسے مرسو مرسو پانی نہ دیسو،آپ دن رات پانی پرمرسو مرسوکریں اور ہمیں کہیں پنجاب میں پانی آپکی مرضی سےاستعمال ہو،توایسا ہوگا نہیں،وڈیرہ ازم اورغریب ہاریوں کے بچوں کو پڑھنے نہ دینا الیکشن میں پذیرائی نہیں ہوتی۔
عظمی بخاری نے شرجیل میمن کا بحث کا چیلنج قبول کرلیا،کہا کہ جگہ اور ٹائم آپکی پسند کا،لیکن آپ خود آئیے گا ضرور کسی پراکسی کے پیچھے مت چھپیے گا۔
