لاہور: صوبائی وزیر قانون کی زیر صدارت انسداد دہشتگردی و ہارڈنڈ دی سٹیٹ کمیٹی کا محکمہ داخلہ میں اہم اجلاس منعقد ہوا، سیکرٹری داخلہ پنجاب نور الامین مینگل نے اجلاس کو امن و امان کی صورتحال بارے بریفنگ دی.
اجلاس میں ایڈیشنل آئی جی پنجاب چوہدری سلطان، سی ٹی ڈی، سیف سٹی، ایس پی یو، ایکسائز اور قانون نافذ کرنے والے اداروں کے افسران نےشرکت کی، اجلاس کے دوران پنجاب میں نیشنل ایکشن پلان پر عمل درآمد کا جائزہ لیا گیا .
اجلاس میں صوبائی وزیر کو صوبے میں قیام امن کے حوالے سے تفصیلی بریفنگ کے ساتھ سی ٹی ڈی پنجاب نے صوبہ کے بارڈر ایریا اضلاع کی سکیورٹی پر بریفنگ دی.
بریفنگ میںبتایا گیا کہ سال 25-2024ء میں 454 مقدمات کا اندراج کیا گیا اور 488 ملزمان کو چالان جبکہ 226 کو سزائیں دلائی گئیں، اس طرح پنجاب بھر میں 15776 کومبنگ آپریشنز کیے گئے اور دہشت گردوں کی مالی معاونت کرنے پر 3 مقدمات و ملزموں کو سزائیں دلائی گئیں.
اجلاس کو چینی باشندوں کی سکیورٹی کے حوالے سے بھی بریفنگ دی گئی اور مزید بتایا گیا کہ سرویلنس کیلئے سیف سٹی 15 اضلاع میں کیمروں کی تنصیب مکمل کر چکی ہے، فیز ٹو میں 19 اضلاع میں کیمروں کی تنصیب رواں سال دسمبر تک مکمل ہو گی.
بریفنگ میںبتایا گیا کہ گداگر مافیا کے خلاف کاروائیوں کا سلسلہ جاری ہے.
صوبائی وزیر قانون ملک صہیب احمد بھرتھ نے کہا کہ قیام امن کیلئے بین الصوبائی چیک پوسٹوں کی تعمیر پر کام جاری ہے، جس کا 31 فی صد تعمیراتی کام کو مکمل کر لیا گیا ہے، مستقبل میں ڈرون سرویلنس اور سی ٹی ڈی کو جدید اسلحہ و ٹیکنالوجی کی فراہمی پر کام ہو رہا ہے.
صوبائی وزیر قانون کا مزید کہنا تھا کہ قانون نافذ کرنے والے اداروں کو جدید اسلحہ و ٹیکنالوجی سے لیس کر رہے ہیں جبکہ صوبہ پنجاب میں امن و امان کے قیام کیلئے متحرک ہیں، ملک صہیب احمد بھرتھ نے ہدایت کی کہ پٹرول کی غیر قانونی فروخت روکنے کیلئے جامع پالیسی بنائی جائے نیز وزیر اعلیٰ پنجاب صوبہ میں قیام امن کیلئے دن رات کام کر رہی ہیں.
