لاہور: پنجاب کے میڈیکل اور ڈینٹل کالجوں میں داخلے کے لیے ایم ڈی کیٹ امتحان 26 اکتوبر کو ہوگا۔
یونیورسٹی آف ہیلتھ سائنسز (یو ایچ ایس) کے زیر اہتمام یہ امتحان صوبے کے 12 شہروں میں ایک ساتھ منعقد کیا جائے گا۔
اس سال پنجاب بھر سے 50 ہزار 458 امیدواروں نے امتحان کے لیے رجسٹریشن کرائی ہے۔ یو ایچ ایس اور محکمہ سپیشلائزڈ ہیلتھ کیئر نے امتحان کے شفاف اور پرامن انعقاد کے لیے تیاریاں تیز کر دی ہیں۔
محکمہ سپیشلائزڈ ہیلتھ کیئر نے 12 اضلاع کے ڈپٹی کمشنرز کو امتحانی انتظامات کے لیے مراسلے جاری کر دیئے ہیں۔ امتحان کے روز لاہور اور ملتان سمیت 12 شہروں میں قائم 26 امتحانی مراکز پر ہائی الرٹ رہے گا۔
جاری مراسلے کے مطابق ریسکیو 1122، نادرا، محکمہ صحت، ٹریفک پولیس اور سیکیورٹی ادارے اپنے فرائض سرانجام دیں گے۔ امتحانی مراکز پر دفعہ 144 کے نفاذ کے لیے محکمہ داخلہ پنجاب کو بھی درخواست دی گئی ہے۔
امتحانی عملے کی تعیناتی کے لیے محکمہ ہائر ایجوکیشن اور محکمہ سکول ایجوکیشن کو خط لکھ دیا گیا ہے جبکہ امن و امان کی صورتحال یقینی بنانے کے لیے آئی جی پنجاب کو بھی مراسلہ جاری کیا گیا ہے۔
یو ایچ ایس میں بھی امتحان کے انعقاد کے حوالے سے تیاریاں جاری ہیں۔ امتحان کے شفاف انعقاد کے لیے سینئر فیکلٹی ممبران کو ڈیوٹیاں تفویض کر دی گئی ہیں جبکہ امتحانی عملے کی سیکیورٹی کلیئرنس بھی مکمل کی جا رہی ہے۔
