لاہور: پنجاب میں ریونیو بڑھانے کےلئے 19 نئے سیکٹرز ٹیکس نیٹ میں شامل کرنے پر غور جاری ہے.
حکومت پنجاب نے اس مقصد کے لئے ریونیو اتھارٹی میں 130 انفورسمنٹ آفیسرز کی بھرتی کی منظوری بھی دے دی ہے۔
حکومت پنجاب نے ٹیکس دہندگان کے لئے پی آر اے نے سہولت ایپ متعارف کرادی ہے ۔
وزیراعلیٰ مریم نواز کی زیر صدارت ریونیو کلیکشن سے متعلق خصوصی اجلاس ہوا۔ پنجاب میں ریونیوبڑھانے کے لئے 19 نئے سیکٹرز شامل کرنے کا جائزہ لیا گیا۔ پنجاب ریونیو اتھارٹی میں سپیشل یونٹ قائم کرنے کا فیصلہ کرلیا گیا۔
ڈی جی پی آر اے معظم علی سپرا نے ٹیکس اہداف اور نئے سیکٹرز کے بارے میں تفصیلی بریفنگ دیتے ہوئے بتایا کہ پی آر اے سپیشل یونٹ میں فیکٹوریل، ٹیکس کنسلٹنٹ، لیگل ایکسپرٹ اور ڈیٹا اینا لسٹ شامل ہوں گے۔
وزیراعلیٰ نے پنجاب ریونیو اتھارٹی میں 130 انفورسمنٹ آفیسرز کی بھرتی کی اصولی منظوری دے دی۔ مریم نواز نے 30 اضلاع تک ریونیو اتھارٹی کی توسیع کے لئے 30 اکتوبر تک کی ڈیڈ لائن بھی مقرر کر دی۔
اضلاع میں ریونیواتھارٹی سے متعلق اضافی ذمہ داریاں اے ڈی سی جی کو تفویض کرنے کی ہدایت کی گئی ہے۔ مریم نواز کا کہنا تھا کہ ایمانداری سے ٹیکس ادا کرنے والوں کو پریشان نہیں کیا جائے،نئے سیکٹر متعارف کرائے جائیں۔
