لاہور: ہائیکورٹ کی پرنسپل سیٹ لاہور نےقیام پاکستان کے بعد کا جائیداد کا تنازعہ حل کردیا، بہن کی اولاد کو جائیداد میں حصے دینے کا ٹرائل کورٹ کا فیصلہ کالعدم قراردیدیا۔
لاہورہائیکورٹ کے جسٹس خالد اسحاق نے جمشید سمیت دیگر کی اپیل پر 29 صفحات پرمشتمل تحریری فیصلہ جاری کردیا۔
فاضل عدالت نے قرار دیا کہ ہندوستان کی تقسیم سے پہلے کریم بخش کی بھارت کے موضع براس میں زمین تھی،قیام پاکستان سے پہلے کریم بخش کا انتقال ہوچکا تھا،اس کے دو بیٹے اورایک بیٹی قیام پاکستان کے وقت ہجرت کرکے پاکستان آئے،کریم بخش کی جائیداد اس کے بڑے بیٹے عبدالغفور کو منتقل ہوئی،جو دوران ہجرت مارا گیا۔
کریم بخش کی فیملی نےسیٹلمنٹ اینڈ ری ہیبلی ٹیشن آرڈینس کے تحت پاکستان میں پراپرٹی کلیم کی ، سال 1952ء میں عبدالغفور کی بیگم اورایک بھائی کوکامونکی میں پراپرٹی الاٹ ہوئی۔
اتھارٹیزنےجائیداد عبدالغفورکی بیگم اوربھائی میں تقسیم کردی،متعلقہ معاہدے میں اس کی بہن غفوراں بی بی کا ذکرنہیں تھا۔ جو سال 1988ء تک زندہ رہی لیکن کسی عدالت سے رجوع نہیں کیا.
غفوراں بی بی کی اولاد نے پہلی مرتبہ سال 2009ء میں دعویٰ دائر کیا،ٹرائل کورٹ نے سال 2013ء میں دعویٰ مسترد کردیا۔عدالت نے درخواست گزار کی اپیل منظور کرلی۔
