لاہور: ہائیکورٹ کی پرنسپل سیٹ لاہور میں مقدمہ کی سماعت ملتوی ہونے پر خود سوزی کرنیوالے نجی کمپنی کے ملازم کی 2 بیویوں کو کمپنی نے ادائیگی کردی.
لاہور ہائیکورٹ میں خود سوزی کرنے والے شہری آصف جاوید کی 2 بیویوں کو نجی کمپنی نے انسانی ہمدردی کی بنیاد پر 75 لاکھ روپے مالیت کے چیک دے دیئے، لاہور ہائیکورٹ کے جسٹس خالد اسحٰق نے درخواست کی سماعت کی، نجی کمپنی نے عدالت میں 75 لاکھ روپے مالیت کے چیک پیش کر دیئے۔عدالت عالیہ نے 37 لاکھ 50 ہزار کے 2 چیک آصف جاوید کی 2 بیویوں کو دینے کی ہدایت کرتے ہوئے درخواست نمٹا دی۔
خیال رہے کہ آصف جاوید نامی شہری کو نجی کمپنی نے 2016ء میں ملازمت سے برطرف کیا تھا،جس پر سال 2019ء میں لیبر کورٹ نے سائل کی برطرفی کا فیصلہ کالعدم قرار دے کر نوکری پر بحال کرنے کا حکم دیا تو نجی کمپنی نے لیبر کورٹ کا فیصلہ نیشنل انڈسٹریل ریلیشن کمیشن میں چیلنج کر دیا تھا۔23 نومبر 2020ء کو نیشنل انڈسٹریل ریلیشن کمیشن نے نجی کمپنی کی اپیل خارج کردی۔
نجی کمپنی نے دسمبر 2020ء میں لاہور ہائیکورٹ میں کیس دائر کیا، جس کے بعد سائل آصف جاوید کا کیس 2020ء سے لاہور ہائیکورٹ میں زیر سماعت تھا۔
شہری نے سماعت ملتوی ہونے پر لاہور ہائیکورٹ کے باہر خود کو آگ لگالی تھی، بعد میں وہ ہسپتال میں زخموں کی تاب نہیں لاتے ہوئے جاں بحق ہوگیا تھا۔
