ملتان:ہائیکورٹ سمیت صوبہ بھر کی عدالتوں میں مقدمات کے اندراج سے قبل درخواست گزاروں کی بائیو میٹرک تصدیق کو لازمی قرار دینے کے حکم کے خلاف لاہور ہائیکورٹ ملتان بنچ میں ایک آئینی درخواست دائر کر دی گئی۔
یہ درخواست ڈسٹرکٹ بار ایسوسی ایشن ملتان کے سابق صدر ملک محبوب سندیلہ ایڈووکیٹ نے سید ریاض الحسن گیلانی ایڈووکیٹ اور وسیم اکرم ڈوگر ایڈووکیٹ کے توسط سے آئین پاکستان کے آرٹیکل 199 کے تحت دائر کی ہے۔
درخواست میں مؤقف اختیار کیا گیا ہے کہ بائیو میٹرک کا مذکورہ تقاضہ شہریوں کے بنیادی حقوق کے منافی ہے۔7 جنوری 2026ء کو جاری کردہ ایک نوٹیفکیشن اور اس کے بعد 18 مارچ 2026ء کو جاری کردہ معیاری آپریٹنگ پروسیجرز (SOPs) کے ذریعے، مقدمات کے اندراج اور پیروی کے لیے اور مقدمات کی نقول کے حصول کیلئے بائیو میٹرک تصدیق کو لازمی قرار دیا گیا ہے، باوجود اس کے کہ اس قسم کی کوئی ضرورت موجود نہ تھی.
آئین پاکستان کے آرٹیکل 4، 9، اور 10-A جو شہریوں کو قانون کے مطابق مساوی سلوک کے بنیادی حقوق، زندگی اور آزادی کے تحفظ اور منصفانہ ٹرائل کے حق کی ضمانت دیتے ہیں۔ درخواست میں مزید کہا گیا ہے کہ نئی شرائط عائد کرنا انتظامی حکم کے ذریعے مقدمات کا اندراج اختیارات کی حد سے تجاوز کرتا ہے اور انصاف تک رسائی میں غیر ضروری رکاوٹیں پیدا کرتا ہے۔ اس اقدام کے ممکنہ منفی نتائج برآمد ہونا شروع ہوچکے ہیں یہ بتاتا ہے کہ مقدمہ دائر کرنے کے لیے بائیو میٹرک تصدیق کو لازمی شرط بنانا انصاف تک بروقت رسائی کے حق کو نقصان پہنچاتا ہے۔
یہ طریقہ کار اضافی فیسوں اور اخراجات کے ذریعے قانونی چارہ جوئی پر غیر ضروری مالی بوجھ ڈالتا ہے۔ دور دراز علاقوں سے سفر کرنے والے مدعیان کو بائیو میٹرک تصدیق مکمل کرنے کے لیے اضافی وقت، رقم اور محنت خرچ کرنے کی ضرورت ہوگی۔ درخواست میں مزید کہا گیا ہے کہ یہ شرط مقدمے کے اندراج کے موجودہ قانونی طریقہ کار، خاص طور پر کوڈ آف سول پروسیجر اور دیگر متعلقہ قوانین سے مطابقت نہیں رکھتی۔
درخواست میں کہا گیا ہے کہ یہ طریقہ کار قیدیوں اور دیگر کمزور گروہوں کے لیے عملی طور پر غیر موثر اور غیر معقول ہے، کیونکہ ایک ملزم کو بھی جیل بھیجنے سے پہلے پیچیدہ تصدیقی مراحل سے گزرنا پڑتا ہے۔
درخواست میں اس بات کی بھی نشاندہی کی گئی ہے کہ 200 روپے فیس میں روپے 60 متعلقہ بار ایسوسی ایشن کے لیے بطور حصہ مختص کیے گئے ہیں، حالانکہ کسی بھی قانون یا ضابطے میں اس طرح کی تقسیم کی کوئی قانونی گنجائش موجود نہیں ہے۔
درخواست میں مؤقف اختیار کیا گیا ہے کہ اگر کچھ وکلاء کے نمائندے اور چیف جسٹس انتظامی طور پر اس طرح کے انتظامات پر باہمی رضامندی ظاہر کرتے ہیں، تب بھی ان کے پاس یہ اختیار نہیں کہ وہ مدعیان پر اس طرح کا مالی بوجھ یا ٹیکس عائد کریں۔
عدالت سے استدعا کی گئی ہے کہ 7 جنوری 2026 کے نوٹیفکیشن اور 18 مارچ 2026 کے ایس او پیز کو غیر قانونی، قانونی اختیار کے بغیر، اور آئین سے متصادم قرار دیا جائے، اور انہیں ختم کیا جائے، اس طرح بائیو میٹرک تصدیق کی شرط کو ختم کیا جائے تاکہ شہری بغیر کسی رکاوٹ کے انصاف تک رسائی حاصل کر سکیں۔
درخواست گذار کے وکلاء کے مطابق مذکورہ درخواست فوری سماعت کے لئے دائر کی گئی تھی، تاہم اسے کل بروز جمعرات کو سماعت کے لئے مقرر نہیںکیا گیا ہے.
