نیویارک: پاکستان کو 4 سالہ مدت کےلیے اقوام متحدہ کے کمیشن برائے منشیات کا رکن منتخب کر لیا گیا۔
پاکستان کا انتخاب نیویارک میں منعقدہ یو این اقتصادی و سماجی کونسل کے انتخابات میں عمل میں لایا گیا ہے۔پاکستان کو سال 2026ء سے سال 2029ء تک چار سالہ مدت کے لیے منتخب کیا گیا ہے۔
پاکستان یواین مشن کے اعلامیے کے مطابق پاکستان یو این اقتصادی و سماجی کونسل کی حمایت پر مشکور ہے، کہ کمیشن برائے منشیات کا رکن منتخب ہونا پاکستان پر اعتماد اور بھروسے کو ظاہر کرتا ہے، اور پاکستان عالمی انسداد منشیات کی کوششوں میں اپنا مؤثر کردارادا کرنے کے لیے تیار ہے۔
اعلامیے کے مطابق پاکستان عالمی سطح پر انسداد منشیات کی کوششوں میں پیش پیش رہا ہے، جبکہ پاکستان ہمیشہ منشیات کی سمگلنگ،پیداوار اور استعمال کے خلاف نمایاں کردار ادا کر رہا ہے۔
اقوام متحدہ میں پاکستان نے عالمی منشیات پالیسی سے متعلق مباحثوں میں بھی ہمیشہ فعال اور تعمیری کردار ادا کیا ہے، جس کی وجہ سے بھی پاکستان کا انتخاب عمل میں لایا گیا ہے۔
