ملتان: جنوبی پنجاب میں 2 وکلاء کے قتل پر قانونی حلقے سراپا احتجاج ہو گئے.
تفصیلات کے مطابق گزشتہ صبح وہاڑی میں وکلاء نے احتجاج کرتے ہوئے مرکزی شاہراہ بند کر دی اور کئی گھنٹے احتجاج کرتے ہوئے پولیس کے خلاف نعرے بازی کی، اس موقع پر وکلاء نے بتایا کہ تھانہ ماچھی وال پولیس نے گھر میںگھس کر نہتے وکیل ذیشان ڈھڈی اور اس کے کزن پر فائرنگ کر کے قتل کر دیا ہے.
احتجاجی وکلاء نے بتایا کہ پولیس نے مقتولین کی لاشیں بھی اپنی تحویل میںرکھی ہوئی ہیں جبکہ والد اور قریبی رشتہ داروں کو بھی حراست میںلے رکھا ہے، جو غیر قانونی اقدام ہے.اس لئے کارروائی کرنے کا حکم دیا جائے.
دوسری جانب جھنگ میں نامعلوم مسلح افراد کی فائرنگ سے سابق صدر بار سمیت 3 افراد جاں بحق ہوگئے۔ آئی جی پنجاب نے واقعے کا نوٹس لے کر آر پی او سے فوری رپورٹ طلب کرلی۔
جھنگ کے علاقے گوجرہ روڈ کے قریب سابق صدر بار منیر سدھانہ گھر سے نکلے تو راستے میں دو مسلح موٹر سائیکل سواروں نے گاڑی پر اندھا دھند فائرنگ کردی، جس کے نتیجے میں سابق صدر بار منیر سدھانہ، ڈرائیور سمیت جاں بحق ہوگئے۔ جبکہ دو راگیر بھی زخمی ہوئے۔ جن میں ایک ہسپتال پہنچ کر دم توڑ گیا۔ جبکہ ایک زخمی ڈی ایچ کیو ہسپتال میں زیر علاج ہے۔
پولیس کے مطابق واقعہ پرانی دشمنی معلوم ہوتا ہے تاہم اس کی تحقیقات کررہے ہیں۔ ڈی پی او بلال افتخار کیانی کا کہنا تھا ملزمان کو جلد گرفتار کر کے کیفر کردار تک پہنچایا جائے گا ۔ دوسری جانب وکلاء برادری میں کافی غم وغصہ پایا جارہا ہے۔
پنجاب بار کونسل کے وائس چیئرمین جناب چوہدری محمد اشفاق کہوٹ، چیئرمین ایگزیکٹو کمیٹی جناب ذبیح اللہ ناگرہ، اور دیگر ممبران نے ڈسٹرکٹ بار ایسوسی ایشن جھنگ کے سابق صدر مہر منیر سدھانہ سیال ایڈووکیٹ کے بہیمانہ قتل کی شدید مذمت کی اور مطالبہ کیا کہ قتل کے ان واقعات میں ملوث ملزمان کے خلاف لائرز پروٹیکشن ایکٹ کے تحت انسداد دہشت گردی کا مقدمہ درج کیا جائےاور ملزمان کو فوری گرفتار کر کے کیفر کردار تک پہنچایا جائے۔
پنجاب بار نے پولیس کے مؤقف کو مسترد کرتے ہوئے کہا کہ پولیس نے حقائق چھپانے اور ملوث اہلکاروں کو بچانے کی کوشش کی۔اس لئے واقعہ کی شفاف انکوائری کے لیے جوڈیشل کمیشن بنایا جائےاور ذمہ داران کو کیفر کردار تک پہنچایا جائے۔
اس سلسلہ میں مورخہ 01 دسمبر 2025 بروز سوموار پنجاب بھر میں ہڑتال کا اعلان کیا گیا ہے۔ پنجاب بھر کے وکلاء یکم دسمبر 2025 بروز سوموار کو عدالتوں میں پیش نہیں ہوں گے۔
