ملتان: سینیئر وکیل کے حادثے میںانتقال کے مقدمہ میں پولیس کی جانب سے مقدمہ خارج کرنے اور ملزمہ کو گرفتار نہیں کرنے پر ڈسٹرکٹ بار ایسوسی ایشن ملتان نے آج مکمل عدالتی بائیکاٹ کا اعلان کر دیا ہے.
ڈسٹرکٹ بار ایسوسی ایشن ملتان کے صدر ملک جاوید علی ڈوگر اور جنرل سیکرٹری ملک عدنان احمد نے تحریری نوٹس بھی جاری کر دیا ہے.
اس ضمن میںجاری نوٹس میںکہا گیا ہے کہ پنجاب بار کونسل کے فیصلے کے مطابق پنجاب کے مختلف اضلاع میں وکلاء کے خلاف بے بنیاد مقدمات درج کرنے اور ملتان میں سید محمود الحسن گیلانی ایڈووکیٹ جن کو خاتون ثمرین دختر ڈاکٹر عمران نزید نے اپنی آلٹو کار سے ٹکر مار کر مضروب کیا تھا جو کہ بعد میںانتقال کر گئے تھےکے سلسلے میںہڑتال کی جائے گی۔
بار عہدیداروںکے مطابق اس کی بابت مقدمہ نمبر 1950 / 25 بجرم 379/322 اور 337-جی ت پ تھانہ کینٹ ملتان میں رجسٹرڈ ہوا تھا، جس میں لیاقت بھٹی SI نے غیر جانبدارانہ تفتیش نہیں کی اور خاتون ثمرین کو نامزد مقدمہ نہیں کیا اور نہ ہی آج تک گرفتار کیا۔
پولیس کے اس ناروا سلوک کے خلاف ڈسٹرکٹ بار ملتان 18 اگست بروز سوموار مکمل ہڑتال کا اعلان کرتی ہے اور وکلاء عدالتوں میں پیش نہیں ہوں گے.
بار نوٹس کے مطابق لیاقت بھٹی سب انسپکٹر تھانہ کینٹ کے ملتان ڈسٹرکٹ بار میں داخلہ پر پابندی بھی عائد کی جاتی ہے.
