لاہور:ہائیکورٹ نے سنوکرکلب کےکاروبارکو جائز اور قانونی قرار دے دیا۔جسٹس جواد ظفر نے شہری محمد راشد کی اپیل پر 5 صفحات پرمشتمل تحریری فیصلہ جاری کردیا۔
عدالت نے شہری کا سنوکر کلب بند کرنے کا ٹرائل کورٹ کا فیصلہ کالعدم قرار دیا۔
عدالتی فیصلے میں کہا گیا ہے کہ سنوکرکلب چلانا قانونی اور تفریحی سرگرمی ہے،کوئی قانون اس پرپابندی عائد نہیں کرتا، آئین کے مطابق ہر شہری کو قانونی بزنس کرنےکاحق ہے۔فیصلے کے مطابق بلیئرڈ اور سنوکر کے کھیل غیراخلاقی نہیں اورنہ ہی قانون کےتحت ممنوع ہیں.
قانونی دائرےمیں چلنے والےکاروبارکو مبہم شکایات پرغیرمعینہ مدت کے لیے بند نہیں کیاجاسکتا۔
درخواستگزار کےمطابق وہ سرگودھا میں سنوکرکلب چلاتا تھا،کاروبارپرمکمل پابندی عدالتی اختیارات کا غلط استعمال ہے،شوریا اوقاتِ کارکوریگولیٹ کیا جا سکتا تھا،مکمل پابندی ضروری نہیں تھی،سنوکر کلب کےذریعے عوام کوبلیرڈ گیم کھیلنے کی تفریح فراہم کی جاتی تھی.
عدالتی فیصلےمیں کہاگیاکہ مخالف نےدرخواستگزار کا سنوکر کلب بند کرنے کیلئے علاقہ مجسریٹ کو درخواست دی،درخواست میں کہاگیا کہ کلب رات دیرکھلارہتا ہےاورشورغل ہوتا ہے،مجسریٹ نےسی ار پی سی سیکشن 133کے تحت سنوکر کلب بندکرنےکا حکم دیا،سنوکر کلب سیکشن سی آر پی سی کے سیکشن 133کے دائرہ اختیار میں نہیں آتا،سیکشن 133 کے اختیارات صرف ہنگامی اوروقتی عوامی خلل کی صورت میں استعمال ہو سکتے ہیں، سیکشن 133 کے تحت حکم محدود اور مخصوص ہونا چاہیے، تاکہ کسی کے معاشی حقوق متاثر نہ ہوں۔
ٹرائل کورٹ نےقوانین کی درست تشریح نہیں کی،عدالت سنوکرکلب بند کرنے کا ٹرائل کورٹ کا فیصلہ کالعدم قرار دیتی ہے،درخواستگزار تمام قوانین کی پاسداری کرتے ہوئےدوبارہ سنوکرکلب کھول سکتا ہے۔
