چیف جسٹس لاہور ہائی کورٹ عالیہ نیلم نے سیکرٹری ڈسٹرکٹ بار ملتان سید عارف حسن شاہ کی لاہور ہائیکورٹ کے جاری کردہ نوٹیفیکیشن کے خلاف دائر کردہ رٹ درخواست پر سمعت کے بعد مزیدسماعت 16 جنوری تک ملتوی کرنے کاحکم دیاہے ۔
فاضل چیف جسٹس نے قبل ازیں ملتان بنچ پر دائر اس رٹ درخواست کو پرنسپل سیٹ پر ٹرانسفر کرنے کا حکم دیا تھا، جس کی گزشتہ روز چیف جسٹس لاہور ہائیکورٹ نے خود سماعت کی ۔مذکورہ رٹ درخواست سابق صدر ہائی کورٹ بارایسوسی ایشن ملتان سید ریاض الحسن گیلانی کے توسط سے دائر کی گئی تھی۔درخواست گزار کے وکیل کے علاوہ لاہور ہائیکورٹ بار کے وکلاء بھی اظہار یک جہتی کیلئے عدالت میں پیش ہوئے۔
سید ریاض الحسن گیلانی نےمؤقف اختیار کیا تھا کہ فاضل چیف جسٹس کے جاری کردہ نوٹیفیکیشن نمبر38620 مجریہ 3 دسمبر 2024 ءکو وکلاءانصاف کے اصولوں کےمنافی قرار دیتے ہیں اوراسے عام آدمی کو انصاف سے محروم کرنے اور بیوروکریسی،پولیس اور انتظامیہ کے خلاف آوازاٹھانے سے روکنے کی شعوری کوشش ہونے کی وجہ سے منسوخ کرنے کی استدعا کرتے ہیں۔انہوں نے کہا کہ حکومت شکایت کے ازالے کیلئے متبادل فورم فراہم کرنے میں ناکام رہی ہے۔انہوں نے کہا کہ ملتان کے وکلاء نے اسے مسترد کردیا ہے اور اسے فوری طور پر واپس لینے کا مطالبہ کیا ہے۔انہوں نے کہا کہ نئے نوٹیفیکیشن نے عام سائلین کیلئے مشکلات پیدا کردی ہیں اور انہیں بیوروکریسی کے رحم وکرم پر چھوڑ دیا ہے۔اب وہ پولیس کی غیر قانونی حراست اور نظر بندی کو بھی عدالت عالیہ میں چیلنج نہیں کرسکتے ہیں۔
