نمائندگان: کراچی میں موسلا دھار بارش کا سلسلہ جاری ہے اور محکمہ موسمیات نے شہر قائد میں آئندہ 2 روز بارش کے حوالے سے اہم قرار دیے ہیں۔محکمہ موسمیات کے مطابق شہر میں ایک سے 2 گھنٹے بعد مزید بارش ہوسکتی ہے، شہر میں آج کے مقابلے میں کل زیادہ بارش کا امکان ہے۔
کراچی میں منگل کی صبح سے وقفے وقفے سے موسلا دھار بارش کا سلسلہ جاری ہے جس کے باعث شہر میں اربن فلڈنگ کی صورتحال پیدا ہوچکی ہے، نشیبی علاقے زیر آب آگئے ہیں اور کئی علاقوں میں پانی گھروں میں داخل ہوگیا ہے۔قائد آباد، لانڈھی، ملیر، گلشن حدید، لیاقت آباد سی ون ایریا اور دیگر علاقوں میں پانی گھروں میں داخل ہوگیا ہے جب کہ شاہراہ فیصل، آئی آئی چندریگر روڈ، ایم آر کیانی روڈ سمیت شہر کی بیشتر شاہراہیں تالاب کا منظر پیش کررہی ہیں۔
شاہراہوں پر پانی جمع ہونے کے باعث ٹریفک جام میں ہزاروں شہری پھنس گئے۔ریسکیو حکام کے مطابق گلستان جوہر بلاک 12 میں گھر کی دیوار گرنے سے 4 افراد جاں بحق ہوگئے جبکہ اورنگی ٹاؤن سیکٹر ساڑھے 11 میں گھر کی دیوار گرنے سے ایک بچہ جاں بحق ہوگیا۔ریسکیو حکام کے مطابق شہر میں مختلف حادثات میں 5 افراد جان بحق ہوچکے ہیں۔
ترجمان محکمہ موسمیات کے مطابق بھارتی ریاست مغربی اوڑیسہ کے پاس ایک سسٹم ڈپریشن کی صورت میں موجود ہے، یہ سسٹم آئندہ ایک سے ڈیڑھ دن میں بھارتی گجرات پہنچ جائے گا۔ ترجمان نے بتایا کہ اس دوران 23 اگست تک بارشوں کا سسٹم سندھ پر اثرانداز رہے گا جس سے صوبے کے اکثر مقامات پر درمیانی اور کہیں شدید موسلا دھار بارش ہوسکتی ہے۔ترجمان کے مطابق بارشوں کا یہ اچھا سسٹم لگ رہا ہے، آئندہ 2 روز کراچی میں بھی بارش کے حوالے سے بہت اہم ہیں جس دوران درمیانی سے تیز موسلادھار بارش کے باعث شہر میں اربن فلڈنگ ہوسکتی ہے۔
موسمیاتی ماہرین کا کہنا ہےکہ مون سون سسٹم بحیرہ عرب میں موجود ہے جس کے باعث کراچی میں آج وقفے وقفے سے بارش ہوتی رہے گی، شہر میں آج تیز بارش ہوئی اور درجہ حرارت میں کمی آئی توکل معتدل بارش کا امکان ہے۔موسمیاتی ماہرین نے عوام سے اپیل کی کہ شدیدگرج چمک کے دوران شہری گھروں سے باہر نہ نکلیں اور گرج چمک کےدوران صرف ایمرجنسی کالز کےلیےفون استعمال کریں۔موسمیاتی ماہرین نے ہدایت کی کہ سڑک پر موجود افراد درخت، باڑ اور کھمبوں سے دور رہیں، آسمانی بجلی کی زد میں آنے والی ہر چیز پر براہ راست اثر ہوتاہے۔
کراچی میں ادھورے ترقیاتی کام معمولی بارش کے بعد مصیبت بن گئے. شہر کی مختلف مصروف سڑکوں پر ادھورے ترقیاتی کام معمولی بارش کے بعد ہی شہریوں کیلئے عذاب بن گئے ہیں۔لیاقت آباد میں سیوریج لائنیں ڈالنے کے بعد گڑھوں کو بند کیے بغیر ہی چھوڑ دیا گیا تھا جس میں بارش کا پانی بھی جمع ہوگیا جب کہ لیاقت آباد ڈاکخانہ پر سیوریج لائن کے گڑھوں میں متعدد گاڑیاں پھنس گئیں۔اس کے علاوہ نارتھ ناظم آباد لنڈی کوتل چورنگی کی سڑک کا ایک حصہ دھنس گیا جس سے ٹریفک کی روانی شدید متاثر ہے اور شہریوں کو مشکلات کا سامنا ہے۔
کمشنر کراچی سید حسن نقوی نے کہا ہے کہ بارش میں شہری احتیاط برتیں اور غیر ضروری طور پر گھر سے نہ نکلیں، شہری بجلی کے پولز اور تاروں سے دور رہیں ہے۔کمشنر کراچی نے مزید کہا کہ پانی کی نکاسی کے لیے انتظامیہ کام کر رہی ہے ۔
دوسری جانب چیف سیکرٹری سندھ آصف حیدر شاہ نے صوبے اور بالخصوص شہر قائد میں بارشوں کے پیش نظر انتظامیہ کو الرٹ رہنےکی ہدایت کی ہے۔چیف سیکرٹری نے انتظامیہ کو ہدایت کی کہ تمام ڈپٹی کمشنرز اپنے عملے کے ساتھ فیلڈ میں موجود رہیں، برساتی پانی کے فوری نکاس کو یقینی بنایا جائے۔چیف سیکرٹری نے کےالیکٹرک،حیسکو اور سیکپو کو بجلی کی فراہمی کو یقینی بنانے، ضلعی انتظامیہ کو محکمہ موسمیات اور پی ڈی ایم اے سے مسلسل رابطہ میں رہنے کی ہدایت کی۔
محکمہ موسمیات کے مطابق آج سب سے زیادہ بارش کراچی ایئرپورٹ پر 125 ملی میٹر ریکارڈ ہوئی جبکہ گلستان جوہر میں 122 ملی میٹر بارش ریکارڈ ہوئی۔ ناظم آباد میں 76.9 ملی میٹر ریکارڈ کی گئی جبکہ گلشن حدید میں 75 ملی میٹر اور یونیورسٹی روڈ پر 59 ملی میٹر بارش ریکارڈ کی گئی۔محکمہ موسمیات کا کہنا ہے کہ کیماڑی میں 30 ملی میٹر جبکہ سعدی ٹاؤن میں 24 ملی میٹر بارش ریکارڈ کی گئی۔شارع فیصل پر 17ملی میٹر اور گلشن معمار میں 11 ملی میٹر بارش ریکارڈ کی گئی۔ائیرپورٹ پر 13 ملی میٹر بارش ریکارڈ کی گئی جبکہ کورنگی میں 14.6، اورنگی میں 12.2 ملی میٹر بارش ریکارڈ کی گئی۔
قائد آباد، لانڈھی، ملیر اور دیگر علاقوں میں پانی گھروں میں داخل ہوگیا ہے جب کہ شاہراہ فیصل، آئی آئی چندریگر روڈ، ایم آر کیانی روڈ سمیت شہر کی بیشتر شاہراہیں تالاب کا منظر پیش کررہی ہیں۔
ایوی ایشن ذرائع کے مطابق بارش اور خراب موسم کے باعث 8 پروازیں منسوخ جب کہ 20 سے زائد پروازیں تاخیر کا شکار ہو چکی ہیں۔سکردو سے کراچی آنے والی پی آئی اے کی پرواز PK-456 لینڈ نہ کرسکی اور اسے متبادل ائیرپورٹ کی جانب موڑ دیا گیا۔ اسی طرح دبئی سے آنے والی پرواز FZ 335 کو کراچی کے بجائے ملتان روانہ کر دیا گیا۔کراچی سے اسلام آباد کی 4 پروازوں کی آمد و روانگی میں بھی تاخیر ریکارڈ کی گئی جب کہ جدہ، دبئی، شارجہ، ابوظبی اور کولمبو سے آنے والی پروازیں بھی وقت پر لینڈ نہ کرسکیں۔کراچی سے مدینہ، دبئی، پشاور،ٹورنٹو، جدہ کی پروازوں میں ایک سے 5 گھنٹے تاخیر ہوئی ۔ کراچی کوئٹہ کی قومی ائیرلائنز کی 2 پروازیں پی کے 310، 311 منسوخ کر دی گئیں،کراچی اسلام آبادکی قومی ائیر کی 2 پروازیں پی کے 308، 309 بھی منسوخ ہوگئیں۔کراچی سے دبئی کی دو پروازیں بھی منسوخ کر دی گئیں۔
ترجمان پی آئی اے کا کہنا ہےکہ تیز ہواؤں اور بارش سے پروازوں کی آمدورفت میں معمولی تبدیلی کی گئی ہے، چند پروازوں کی منزل تبدیل ہوگئی اور ان کو متبادل ائیر پورٹس پر اتارا گیا ہے۔ترجمان کا کہنا ہےکہ موسم کی خرابی کے باعث پروازوں کی آمدورفت میں تاخیر ہوسکتی ہے۔موسم کی غیر متوقع صورتحال کے پیش نظر مسافر پروازوں کے متعلق معلومات لیں۔
وزیر تعلیم سندھ سردار شاہ کا کہنا ہے کہ کل ممکنہ بارشوں کے باعث شہر کے سکول بند رہیں گے۔سندھ کے سینیئر وزیر شرجیل انعام میمن کا بھی کہنا ہے کہ کل کراچی میں نجی اور سرکاری سکولز بند رہیں گے۔
