ملتان: ریسکیو 1122 ملتان کی جانب سے انٹرنیشنل فائر فائٹر ڈے کے موقع پر آگاہی واک فلیگ مارچ اور سیمینار کا انعقاد کیا گیا۔ جس کا مقصد فائر فائٹرز کو خراج تحسین پیش کرنا اوران کی خدمات کا اعتراف کرتے ہوئے عوام الناس کو فائر سیفٹی کے متعلق آگاہی فراہم کرنا ہے تاکہ کسی بھی آگ لگنے کے واقع کے دوران کمیونٹی کو ان کے اہم کردار سے متعلق آگاہی فراہم کی جاسکے اور فائر ایمرجنسی کے واقعات میں کمی ممکن بنائی جا سکے۔
واک کا آغاز چوک قذافی سے ہوا جو مدنی پارک پر اختتام پذیر ہوئی۔واک کے شرکاء نے فائر فائٹرز کی خدمات کے اعتراف بارے اور فائر سیفٹی سے متعلق بینرز اور چارٹ اٹھا رکھے تھے۔ واک کی قیادت ڈسٹرکٹ ایمرجنسی آفیسر ڈاکٹر حسین میاں نے کی۔ دیگر شرکاء میں ایمرجنسی آفیسر انجینئر محمد بلال، ریسکیو اینڈ سیفٹی آفیسر محمد ارشد خان، فائر ریسکیوز، والنٹیئرز، سول سوسائٹی اور ریسکیورز نے بھرپور شرکت کی اور بعد میں فائر فائٹرز زندہ آباد، فائر ریسکیو زندہ باد، ہم ہیں ریسکیور کے نعروں کے ساتھ واک کا اختتام کیا۔
فائر فائٹرز ڈے کے موقع پر نجی سکول کے طلباء نے ریسکیو سنٹرل سٹیشن چوک قذافی کا دورہ بھی کیا انھیں فائر فائٹنگ میں استعمال ہونے والے آلات کے بارے میں معلومات دی گئی اور ریسکیو کنٹرول روم کا دورہ بھی کروایا گیا، بچوں نے فائر فائٹرز ڈے کے موقع پر مختلف آگ بجھانے والے آلات کے پلے کارڈز بھی بنا رکھے تھے۔
واک کے بعد”فائرفائٹرزحقیقی ہیروزہیں“ کے موضوع پرریسیکوہیڈ آفس میں سیمینارمنعقد کیا گیا، سیمینار کی صدارت ڈسٹرکٹ ایمرجنسی آفیسر ڈاکٹر حسین میاں نے کرتے ہوئے اپنے خطاب میں کہا کہ فائرفائٹرز درحقیقت قوم کے حقیقی ہیروزہوتے ہیں کیونکہ فائرفائٹرز نہ صرف انتہائی مشکل کی گھڑی میں لوگوں کی مددکرتے ہیں بلکہ بعض اوقات لوگوں کی مال وجان کی حفاظت کرتے ہوئے اپنی جانوں کا نذرانہ بھی پیش کرتے ہیں، فائٹرز اپنی زندگیاں خطرے میں ڈال کر لوگوں کے جان ومال کا تحفظ کرتے ہیں فائر فائٹر ہمارے ماتھے کا جھومر ہیں انکی بدولت لوگوں میں احساس تحفظ پیدا ہوتا ہے کہ کسی بھی نا گہانی صورتحال میں ریسکیو 1122کے فائر فائٹرز ملتان کی عوام کی خدمت کیلئے ہر دم تیار ہیں۔
اس کے ساتھ ساتھ انہوں نے اس دن کی مناسبت سے بلند منزلہ عمارتوں کے مالکان سے ایمرجنسی سروسز ڈیپارٹمنٹ کی طرف سے بنائے گئے فائر سیفٹی کے قوانین پر عمل در آمد پر بھی زور دیا تاکہ بلند بالا عمارتوں کو فائر لگنے کے واقعات سے محفوظ بنایا جاسکے۔
