کراچی: پاکستان کو سکواش کے میدان میںبرسوں بعد بڑی خوشخبری مل گئی، نور زمان نے ورلڈ انڈر 23 سکواش چیمپئن جیت کر ملک کا نام پوری دنیا میں روشن کر دیا ۔
پاکستان کے نور زمان نے چیمپئن شپ کے فائنل میچ میں مصر کے کریم الترکی کو 3-2 سے شکست دیتے ہوئے بڑی کامیابی سمیٹی ۔نور زمان نے دو گیمز کے خسارے کے باوجود ہمت نہیں ہاری اور باقی 3 سیٹجیتنے کے بعد ٹائٹل کو اپنے نام کرنے میں کامیاب رہے ۔
نورزمان نے کامیابی پر کہا کہ پہلے توحکمت عملی یہی تھی کہ آخر تک مقابلہ کروں، میچ کافی اچھا تھا، مصری کھلاڑی حال ہی میں بھارت میں ایونٹ جیت کر آیا، اور پہلے 2 سیٹ ہارنے کے بعد مایوسی ہوئی لیکن ہمت جمع کرکے کوشش یہی کی تھی کہ اچھا کھیلوں اور جیت سکوں، میچ کیلئے پریشرنہیں لینے کا فیصلہ کیاتھا اور ایسا ہی کیا۔
وزیراعلیٰ سندھ مراد علی شاہ نے انڈر 23 ورلڈ سکواش چیمپئن شپ کا فائنل جیتنے پر نور زمان کو مبارکباد پیش کرتے ہوئے پیغام میں کہا کہ مقابلہ انتہائی دلچسپ تھا،دیکھنے میں بڑا لطف آیا، نور زمان نے بڑی مہارت سے کھیلا اور جیت اپنے نام کی، ہمارے کھلاڑی اسی لگن کو برقرار رکھتے ہوئے ملک کا نام روشن کرتے رہیں گے۔
