ملتان:وفاقی محتسب برائے انسداد ہراسیت (FOSPAH) نے جنوبی پنجاب میں انصاف تک رسائی پروگرام کو توسیع دینے کے لیے ملتان میں اپنے سب ریجنل آفس کا آغاز کر دیا ہے، جس کے قیام کا مقصد جنوبی پنجاب کے لوگوں، بالخصوص خواتین کے لیے کام کرنے کی جگہ پر ہراسانی کےخاتمے اور متاثرہ اشخاص کو انصاف ان کی دہیلیز پر مہیا کرنا ہے۔
ملتان میں وفاقی محتسب برائے انسداد ہراسیت ملتان ریجن کے اسسٹنٹ ڈائریکٹر ایم اصغر شاہد نے ایک غیر رسمی ملاقات میں بتایا کہ ملتان کا ذیلی دفتر جنوبی پنجاب کے لوگوں کو انصاف کی فراہمی میں وفاقی محتسب برائے انسداد ہراسیت میڈم فوزیہ وقار کے عزم کی عکاسی کرتا ہے۔
وفاقی محتسب برائے انسداد ہراسیت میں شکایت درج کرانے پر کسی قسم کی کوئی فیس لاگو نہیں ہوتی، مزید یہ کہ FOSPAH دفتر میں فریقین کو قانونی معاونت فراہم کرنے کے لیے عملہ موجود ہے۔ FOSPAH سب ریجنل آفس ملتان جنوبی پنجاب کے مختلف وفاقی اور پرائیویٹ اداروں میں لوگوں کی آگاہی کے لیے سیمینار اور انسداد ہراسیت کمیٹیوں کی تشکیل اور ٹریننگ کے لیے کوشاں ہے- ہراساں کرنے اور امتیازی سلوک کے خلاف زیرو ٹالرینس کے کلچر کو فروغ دیا جارہا ہے تاکہ متاثرہ خواتین و حضرات کو انصاف کی فراہمی یقینی بنائی جا سکے اور محفوظ ماحول پیدا کیا جائے جہاں خواتین اور مرد وقار کے ساتھ کام کر سکیں۔
وفاقی محتسب برائے انسداد ہراسیت کے ذریعے ٹرانسجینڈر افراد کے سماجی و قانونی حقوق کے تحفظ کو یقینی بنانے اور انہیں درپیش امتیازی سلوک کے خلاف آواز اٹھانے کے لیے بھی خصوصی اقدامات کیے جارہے ہیں مذید یہ کہ FOSPAH اسلام آباد کی حدود میں واقع خواتین کی جائیداد میں ان کے جائز حقوق دلوا کر انہیں معاشی طور پر با اختیار بنانے میں اپنا کلیدی کردار ادا کر رہا ہے۔
