اسلام آباد: کفایت شعاری مہم کے باوجود ملک میں پیٹرولیم مصنوعات کی فروخت میں اضافہ ہوگیا۔ آئل مارکیٹنگ کمپنیوں کی فروخت مارچ میں 13 فیصد تک بڑھ گئی۔
ذرائع کے مطابق مارچ میں پیٹرولیم مصنوعات کی فروخت 1.44 ملین ٹن ہوگئی،سالانہ بنیادوں پر 19 فیصد اضافہ ہوگیا۔ رواں مالی سال کے 9 ماہ میں او ایم سیز فروخت 12.40 ملین ٹن رہیں، آئل مارکیٹنگ کمپنیوں کی مجموعی سیلز میں 5 فیصد سالانہ اضافہ رہا۔
پیٹرول کی فروخت 0.67 ملین ٹن، 16 فیصد سالانہ اضافہ رہا، ڈیزل کی فروخت 0.62 ملین ٹن رہی، 21 فیصد اضافہ ریکارڈ کیا گیا، فرنس آئل کی فروخت میں 98 فیصد ماہانہ کا بڑا اضافہ ریکارڈ کیا گیا۔ پی ایس او کی سیلز 0.63 ملین ٹن،اٹک پیٹرولیم کی 0.11 ملین ٹن رہی۔
دوسری جانب میڈیا زرائع کے مطابق حکومت نے آئی ایم ایف کو عالمی قیمتوں کے مطابق پیٹرولیم مصنوعات کی قیمتیں بڑھانے کی یقین دہانی کرا دی۔ آئندہ ہفتے سے پیٹرولیم مصنوعات کی قیمتوں میں سو روپے فی لیٹرسے زائد اضافے کا امکان ہے۔
عالمی مالیاتی فنڈ (آئی ایم ایف) نے پیٹرولیم مصنوعات پر مزید ممکنہ سبسڈی پر تحفظات کا اظہار کردیا۔ حکومت نے تیل کی عالمی قیمتوں کے مطابق ایڈجسٹمنٹ کی یقین دہانی کرا دی۔
وزیراعظم نے گزشتہ ہفتے پیٹرول پر 95 روپے فی لیٹر اضافے کی تجویز مسترد کی تھی، وزیراعظم نے ڈیزل پر 203 روپے فی لیٹر اضافہ سے بھی روک دیا تھا۔ حکومت نے قیمتیں برقرار رکھنے کیلئے تیل کمپنیوں کوترقیاتی بجٹ سے رقم دی تھی۔
ذرائع وزارت پیٹرولیم کے مطابق ترقیاتی بجٹ سے نکالے گئے 100 ارب میں سے 56 ارب کی گزشتہ ہفتے سبسڈی دی جا چکی، اگر پی ایس ڈی پی کی رقم مزید استعمال کی گئی تو اضافہ کم ہو سکتا ہے، وفاقی حکومت صوبوں کی مشاورت سے قیمتوں میں ردوبدل کا فیصلہ کرے گی۔
واضح رہے کہ گزشتہ ہفتے عالمی مارکیٹ میں پیٹرولیم مصنوعات کی قیمتیں 106 سے 108 ڈالرفی بیرل تک تھیں، اس وقت بھی عالمی مارکیٹ میں پیٹرولیم مصنوعات کی قیمتیں 106 سے 108 ڈالر کے درمیان ہیں۔
