اسلام آباد: ہائیکورٹ میں پاکستان براڈکاسٹنگ کارپوریشن کے ملازمین کی بحالی اور کروڑوں روپے کے واجبات روکنے سے متعلق کیس کی سماعت ہوئی جس دوران جسٹس محسن اختر کیانی نے حکومتی رویے پر سخت برہمی کا اظہار کردیا ۔
سماعت کے دوران جسٹس محسن اختر کیانی نے ریمارکس دیئے کہ لوگوں کا اپنے واجبات حکومت سے لینا کتنا مشکل ہوگیا ہے۔ لوگ چکر لگاتے رہتے ہیں جبکہ حکومت نے کروڑوں روپے روک رکھے ہوئے ہیں۔
فاضل جج نے ریمارکس دئیے کہ ایک دن تنخواہ کے بغیر گزارنا مشکل ہوتا ہے، یہ تو ساڑھے چار سال ہوگئے۔
عدالت نے استفسار کیا کہ اب ادائیگی کب تک کریں گے؟ اس پر اسسٹنٹ ڈائریکٹر ایڈمن نے بتایا آج یا کل تک تنخواہ ادا کر دی جائے گی۔ جسٹس محسن اختر کیانی نے باقی واجبات سے متعلق بھی سوال کیا۔ حکومتی نمائندے نے جواب دیا ہائیکورٹ کے فیصلے کے خلاف سپریم کورٹ میں اپیل دائر کی جا رہی ہے۔
اس پر فاضل عدالت نے ہدایت دی کہ ملازمین سے حلف نامہ لے لیں کہ اگر اپیل منظور ہو گئی تو تمام رقم واپس کر دیں گے۔ عدالت نے ان ہدایات کے ساتھ سماعت ملتوی کردی۔
