اسلام آباد: چیف جسٹس کی پنشن سال 2010ء میں 5 لاکھ 60 ہزار اور سال 2024ء میں 23 لاکھ 90 ہزار ہوگئی.
چیف جسٹس کی پنشن میں سال 2010ء سے سال 2023ء تک بتدریج اضافہ ہوا، جبکہ سال 2024ء میں 7 لاکھ سے زائد کااضافہ کیا گیا.
وزارت قانون و انصاف نے ریٹائرمنٹ کے بعد چیف جسٹس پاکستان کی پنشن اور مراعات کی تفصیلات سینیٹ میں پیش کردیں۔
سینیٹ میں وقفہ سوالات میں دئیے گئے تحریری جواب میں سال 2010 ء سے سال 2024ء تک پنشن میں کیے گئے اضافے کی تفصیلات بھی پیش کی گئیں۔
وزارت قانون نے بتایاکہ سال 2010ء میں چیف جسٹس کو 5 لاکھ 60 ہزار پنشن ملتی تھی، سال 2011ء میں چیف جسٹس کی پنشن 6 لاکھ 44 ہزار تھی، سال 2012ء میں پنشن 7 لاکھ 73 ہزار ہوئی اور پھر سال 2013ء میں چیف جسٹس کی پنشن 8 لاکھ 50 ہزار ہو گئی۔
وزارت قانون کے مطابق سال 2014ء میں چیف جسٹس کی پنشن 9 لاکھ 35 ہزار ہوئی، سال 2015ء میں چیف جسٹس کی پنشن 10 لاکھ 5 ہزارہو گئی، سال 2016ء میں چیف جسٹس کی پنشن 11لاکھ 5 ہزار اور سال 2017ء میں 12 لاکھ 17 ہزار تھی جبکہ سال 2018ء میں چیف جسٹس کی پنشن 13 لاکھ 38 ہزار ہوئی اور سال 2021ءمیں چیف جسٹس کی پنشن 14 لاکھ 52 ہزار ہو گئی۔
وزارت قانون کا کہنا ہے کہ سال 2023ء میں چیف جسٹس کی پنشن 16 لاکھ 57 ہزار ہوئی اور سال 2024ء میں چیف جسٹس کی پنشن 23 لاکھ 90 ہزار ہو گئی۔
جج کی بیوہ کو ملنے والی پنشن کی تفصیلات بھی سینیٹ میں پیش کی گئیں۔
وزارت قانون نے جواب میں بتایاکہ جج کی بیوہ کو ڈرائیور، اردلی ملے گا، جج کی بیوہ کو 2 ہزار یونٹ بجلی اور مفت پانی کی سہولت بھی حاصل ہے اور جج کی بیوہ کو ماہانہ 300 لٹر پٹرول بھی دیا جاتا ہے جبکہ جج کی بیوہ سے انکم ٹیکس نہیں لیا جائے گا۔
