ملتان: وائس چانسلر بہاء الدین زکریا یونیورسٹی ملتان ڈاکٹر محمد زبیر اقبال نے کہا ہے کہ انسٹی ٹیوٹ آف بینکنگ اینڈ فنانس کے زیر اہتمام منعقدہ انٹرپرینور میلہ سے تعلیم یافتہ نوجوانوں کو نئے بزنس آئیڈیاز کے ذریعے اپنا کاروبار شروع کرنے کے بہترین مواقع میسر آ ئیں گے.
انٹرپرینور میلے کے افتتاح کے بعد مختلف سٹالز کے دورے کے موقع پر انہوں نے مزید کہا کہ انہیں دیکھ کر خوشی محسوس ہو رہی ہے کہ ہمارے طلبہ و طالبات تعلیم کے ساتھ ساتھ تخلیقی صلاحیتوں سے بھی مالا مال ہیں اور یہ لوگ مستقبل میں اچھے بزنس انٹرپرینور بنیں گے. انٹرپرینور میلے میں 45 سے زیادہ نئے بزنس آئیڈیاز کے تحت کاروبار شروع کرنے کے حوالے سے طلبہ و طالبات نے وائس چانسلر کو اپنے بزنس پلان کے بارے میں بریفنگ دی.
اس موقع پر ڈائریکٹر انسٹی ٹیوٹ آف بینکنگ اینڈ فنانس ڈاکٹر احمد تسمان پاشا نے کہا کہ ان کا ادارہ تعلیم کے ساتھ ساتھ طلبہ و طالبات کو ایک اچھا اور کامیاب بزنس مین بنانے کے لیے بھی سرگرم عمل ہے، یہی وجہ ہے کہ انٹرپرینور میلے میں 10 سے زیادہ نئے بزنس آئیڈیاز کو چیمبر آف کامرس ملتان اور بزنس کمیونٹی نے عملی جامہ پہنانے کے لیے فنڈنگ فراہم کرنے کی یقین دہانی کروائی ہے جبکہ انسٹی ٹیوٹ آف بینکنگ اینڈ فنانس کی سماجی تنظیم "سہارا ہمارا” کے لیے بھی خطیر رقم عطیہ کی گئی ہے.
انسٹی ٹیوٹ آف بینکنگ اینڈ فنانس کے انٹرپرینور میلے میں چیمبر آف کامرس ملتان کے صدر میاں بختاور تنویر شیخ، معروف صنعت کار شیخ فیصل سعید، چیمبر آف سمال انڈسٹریز کے صدر شیخ محمد عمیر نے بھی مختلف سٹالز کا دورہ کیا اور طلبہ و طالبات کے پروجیکٹس میں دلچسپی کا اظہار کرتے ہوئے انہیں یقین دہانی کرائی کہ ان پروجیکٹس کو عملی جامہ پہنانے کے لیے فنڈنگ فراہم کریں گے.
دن بھر جاری رہنے والے انٹرپرینور میلے میں صنعت کاروں اور کاروباری افراد کے علاوہ پروفیسر ڈاکٹر آصف یاسین، ڈاکٹر اسد الرحمن، ڈاکٹر محمد عرفان، ڈاکٹر محمد حارث، مریم عارف، رائمہ عدیل، احمد جواد سمیت دیگر سٹاف نے شرکت کی۔
